Ka Dorbar District Council
Ha ka 29 tarik u Naitung ka United Khasi & Jaintia Hills Dist. Council, ka la shong Dorbar. Ha ka jingsdang jong ka Dorbar ka la pynpaw ïa ka jingduh kaba khraw ha ka bynta ka jingkhlad noh u Myntri Rangbah ka Ri India u Sri, Jawaharlal Nehru, bad kumta ha katei ka sngi, ka Dorbar ka la sangeh ïa ki kam jong ka, kum ka dak jingsngew burom ïa u Nehru. Ka Dorbar ka la mynjur ïa ka jingthung ïa u Sordar ka Tynriang. ïa kiwei kiwei ki Sordar, ym shym lah ban mynjur ïa ka jingthung jong ki namar, ka liang ba pyrshah, ka la dawa, ba dei ban da pule madan ïa ki jingthoh kiba ïadei ha ka jingthung ïa kine kiwei pat ki Sordar, bad ba ka liang synshar, kam shym la mynjur ban leh kumta.
Ha ka bynta ka jingpynkylla kaba saw (fourth amendment) jong ka Riti Synshar ka Dist. Council, kaba ïadei bad ka jingpynbeit ïa ki 20 tylli ki Shnong (Constituency), na bynta ban pynlong ïa ka election, la hap pynsangeh noh ïa ka namar, ka liang ba pyrshah kam shym lah ban mynjur ïa ka jingthung jong ka “Select Committee”, ha kaba ka liang synshar, ka la kynthup ruh ïa ar ngut ki briew jong ka liang ba pyrshah, ka la thung da kaba pyndonkam da ka bor kaba hapoh ka (Rule 30.A) ka liang ba pyrshah ka la dawa ba dei ban thung ia ka “Select Committee”, da ka Council baroh kawei. Bad namar katei ka daw, ïa ka election M.D.C, ym pat lah ban ong lano kan long.
[U NONGSAIÑ HIMA (1 tarik Nailar, 1964)]
