Guwahati, Risaw:
Ar ngut ki briew kynthup u pulit jong ka tnat CRPF, ki la mynsaw ha ka jingbthei jong u bom hajan ka ïingsah jong u Myntri ka Manipur uba dei khmih ïa ka tnat ki kam pynroi ha ki jaka nongkyndong, u Yumnam Khemchand, ha ka shnong Yumnam Leikai kaba don ha Imphal West distri, la ïathuh ki pulit ha ka Sngi U Blei.
Katba u Myntri bad ki dkhot jong ka longïing jong u ka la lait na ka jingshah ktah na katei ka jingjia, uwei u pulit CRPF uba la ap ha ka khyrdop jong kane ka ïing u la mynsaw.
Une u pulit uba dei na West Bengal, u la mynsaw na ki bynta ka kti jong u. Ar ngut ki briew kiba la mynsaw ha ka jingjia, ki dei kiba don ha ka kali ar shaka, ha kaba u bom ba la kawang, u la hap ha madan ha ka jaka kaba jngai da kumba katto katne mitar na ka khyrdop jong ka ïingsah jong u Myntri, la ïathuh ki pulit.
Haduh ba la thoh ïa ka khubor, ki pulit kim pat kem ïano ïano ruh bad ki pulit ki dang pynlong ïa ka jingtohkit ha kaba ïadei bad ka jingjia.
Ki pulit ki la pynkhlaiñ ïa ka jingpahara ha katei ka thaiñ hadien ba la jia ka jingjia. Kumba la ïathuh da ki pulit, la ong ba ym pat don mano mano ruh ban kam ba ki la donkti ha kane ka jingpynbthei bom.
Ka jingtohkit jong ki pulit ha kaba ïadei bad ka jingjia ka dang ïaid shakhmat.
