Jowai, Naiwieng 02
Ryngkat bad ki parabangeit Katholik kiba don ha kylleng ka pyrthei, ki bangeit ka Balang Katholik, St. Theresa Cathedral Church, Jowai Parish, ki la duwai bad kynmaw burom ïa ki mynsiem jong kiba la khlad noh ha ka Sngi Palei.
Ha kane ka sngi, ïa ka Mass Bakhuid na ka bynta kiba la khlad la tyrwa da u Bishop ka Jowai Diocese u Rt. Rev. Ferdinand Dkhar ha ka jingïadonlang u Rev. Fr. Hilarius Lamare bad Rev. Fr. S. Sungoh, Rev. Fr. Lawrence Paswet bad kiwei ki riewniam.
U Bishop, haba ai jingkren ha ka Mass Bakhuid, u la ong, ka jingduwai na ka bynta kiba khlad ka long shi bynta ban pynkhuid, ban pynbiang ïalade khnang ba yn dup snohlang bad ki angel riewkhuid ha bneng bad lyngba ka jingduwai kin sa ïoh kata ka jingjahthait bymjukut bad ka jingim bymjukut ha bneng.
U Bishop u la pynkynmaw ruh ïa ki parabangeit ïa ki kyntien jong uwei u nongthoh poitri bapawnam ka ri Bilat kaba thew ïa kiba dang im ha ka sla pyrthei, bad u la ong ka jingkhmih lynti na kiwei ka pynmong bad pynsngewsih, ka jingim ka long kaba lyngkot. Namarkata, ieid ïa la ka jingim, long barabor ki bakmen bad kiba phuh samrkhie, shwa ban kren dei ban da sngap, shwa ban thoh to da pyrkhat, shwa ban duwai to da map, shwa ban isih to da ieid, shwa ban iehnoh to da pyrshang bad shwa ba ïap to nang im.
Haba kut jong ka jinglehniam u Bishop ryngkat ki Lyngdoh ki la shim ïa ka bynta ban synreit da ka um kyrkhu ïa u lum jingtep katba ki bahaïing hasem ki ïalum lang ha ki jingtep jong ki baieid bathoiñ jong ki ban buh ïa ki jingduwai.
