Nongstoiñ, Naiwieng 03
Ha ka Sngi Thohdieng, ka Joint Action Committee (JAC) jong 4 tylli ki shnong ba kynthup ïa ka Nongmisei, Nongumkap, Porthyrnang, Nongkabur bad Nongumkap ka la ïoh ban aiti ïa ka dorkhas sha u SDO ka MePDCL, Mawshynrut Civil Sub-Division.
Ki nongïalam ka JAC, ki la ong ba katei ka jingleit ban aiti ïa ka dorkhas ka long ban pynkynmaw bad ïakren biang bad u SDO halor ka jingkyrpad ban pynbeit thymmai ïa ka laiñ jong ka bording ka ban sa ïaid lyngba ka Nongjri, Mawpaier, Nongmisei, Porthyrnang, Nongkabur shaduh Nongumkap.
Ki nongïalam ka JAC ki la pynpaw ruh ba ïa katei kajuh ka mat, ha ka 26/7/ 2023 ka la leit ban ai da ka dorkhas ha shlem treikam u SDO.
La pynpaw ruh ba ka Nongmisei kaba ïasnoh na Ri-lum Garo ka shem jynjar haduh katta-katta lada ki duh bording lane kiew ka bai bording bad ban aiti ïa ki ‘bill’ jong ka bording namar ka hap leit shaduh Nonggalbibra Civil Sub-Division, South Garo Hills.
Ka JAC ka la kyrpad ïa u SDO ba un shimkhia kloi katba lah halor katei ka jingkyrpad namar ki shnong kiba hap ha kitei ki thaiñ ki la sohsat bad jynjar sat halor ka jingduh bording khah-khah na ka jingjngai palat ka laiñ ka barim ba la pynïaid ïa ka bording.
Ha ka jingkren bad u SDO na ka liang jong u, u la kular ban shim khia mardor da kaba wan noh ban peit ne jngoh ïa katei ka jingkyrpad ha ki sngi bad ki taïew ban wan.
