Shillong, Naiwieng 03
Ka Meghalaya Residents Safety and Security (Amendment) Bill, 2020 kaba don baroh shikatta bad ka Ministry of Home Affairs (MHA) jong ka Sorkar Pdeng la pynphai sha ka Sorkar Jylla ha ryngkat ki jingpan jingshai lyngba ki jingkylli, bad na ka liang ka Sorkar Jylla ka dang pynkhreh ban phah biang ïa ki jubab.
Haba kylli na u Sym-bud Myntri Rangbah, Bah Prestone Tynsong, u la ong ba kane ka aiñ ka la don bad ka Sorkar Jylla mynta bad yn sa nang ïakren ïa ka mat kumno yn leh.
Haba kylli halor ka jingdonkam ban buh ïa ki jaka rung jaka mih kat-kum ka aiñ MRSSA 2016, u Bah Prestone u la ong ba kane ka kam ka sahteng namar dang ap ban ïoh jingmynjur ïa ka MRSS Amendment Bill, 2020.
Ka MRSS (Amend-ment) Bill, 2020 ka dei kaba la dep mynjur da ka Ïingdorbar Thawaiñ ka Jylla ha ka 19 tarik Lber, 2020, hynrei ym shym la lah ban pyntreikam namar khlem pat ïoh ïa ka jingmynjur jong u Lat ka Jylla.
Ka tyllong khubor ka ïathuh ba ki don ki bynta kiba ka MHA ka buh ki jingkylli bad pan jingshai ha kaba ka Sorkar Jylla kan sa ai ki jubab, bad hap khmih bniah bha namar ka dei ka mat kaba ïadei bad ka aiñ bad ruh ki bynta kiba don hapoh ka Riti Synshar ka ri India.
Kum ban shu pynkynmaw, ka Sorkar MDA ka la wanrah ïa jingpynkylla hapoh ka MRSSA, 2016 kaba tip kum ka Meghalaya Residents Safety and Security (Amendment) Bill, ha kaba la banjur ïa ka jingdonkam ban pynrung kyrteng ïa ki briew kiba wan nabar Jylla sha Meghalaya kynthup ki nongjngohkai (tourists).
