Baghmara, Naiwieng 03
Shi sngi hadien ka jingshah kem jong 5 ngut ha ki pulit ka WGH halor ka jingkynnoh leh be-ijot ïa kawei ka khynnah (ha WGH) ba hapoh 18 snem ka rta, sa kawei pat ka jingjia ka la paw pyrthei – ha kane ka kynti, ha South Garo Hills (SGH) ha kaba kawei ka khynnah ba dang hapoh 18 snem ka la shah kynnoh leh be-ijot ha u kpa-nah ha ka 1 tarik u Naiwieng.
Utei uba shah kynnoh donkti uba don ha kti ki pulit, u la leh ïa katei ka kam pap kam sang ïa katei ka khynnah (12 snem ka rta) katba ka kmie jong ka, ka dang leit pyndep ïa ki kam ki jam.
Ha kaba sdang, ka kmie ka la pyntip ïa katei jingjia sha Jadi Outpost ha ka por 5 baje jong ka janmiet 1 tarik Naiwieng, ha kaba hadien kane, utei u kpa-nah u la shah kem. Haba ïadei bad katei, la pynngat mukotduma hapoh ka POCSO ha Baghmara PS bad ïa utei uba shah kynnoh donkti la phah sha ‘Judicial Custody’ hadien ba la kem ïa u ha ka Sngi Palei.
