Guwahati, Naiwieng:
Ka kynhun pulit ba la lamkhmat da u Kapil Chandra Das, uba long u Officer-in-Charge jong ka Dhubri College Nagar Police Station, u la pynlong ïa ka jingleit khynra hadien ba la ïoh jingtip halor ka jingdon jong ki briew kiba la rah ïa ka pisa thok.
Na kane ka jingleit khynra, ka kynhun jong ki pulit ka la ïoh ban kurup ïa ka pisa thok bad ïoh ruh ban kem ïa arngut ki nongpynïaid ïa kine ki pisa.
Ha ka por ba la pynlong ïa ka jingleit khynra ha jan ka jingkieng Phulbari kaba don ha Dhubri, ki pulit ki la kem ïa kine ki arngut ki briew ha kaba ki la kurup ïa ka pisa kaba la kot sha ka T. 99,000 ha ki lut T. 500. Ïa kine kiba la shah kynnoh la tip kyrteng kum u Hazrat Ali bad u Golap Ali.
Kumba ka long mynta, la ong ba ki pulit jong ka Dhubri ki la ïalam ïa kine ki arngut na ka bynta ka jingtohkit.
Ha basdang u bnai Risaw, ïa ka pisa thok kaba la kot sha palat T. 3 lak la ïoh ban kurup ha ka por ba la pynlong ïa ka jingleit khynra ha ka rel ha Bongaigaon kaba don ha Assam.
Hadien ba la ïoh jingtip halor ka jingdon jong kine ki briew, ki pulit ka tnat Railway, ki la pynlong ïa ka jingleit khynra ha Kanchenjunga Express kaba la poi ha New Bongaigaon Express.
Ïa ka pisa thok kaba la kot sha ka T. 37 lak bad 17 hajar la ïoh ban kurup na kawei ka bynta jong ka rel.
Uwei u briew ïa uba la tip kyrteng kum u Sadiq Raza u la shahkem ha ryngkat ki pisa thok.
U Raza ha ka por ba u la shah tohkit u la phla ba u la wanrah ïa kane ka pisa na Guwahati.
