Agartala, Naiwieng:
Ka seng Congress ha Tripura ka la phah shithi sha ka All India Congress Committee (AICC), ha kaba ka la kyrpad ba la dei ban pynshitom katkum ki kyndon ba la buh pyrshah ïa u MLA jong ka seng u Birajit Sinha.
Ha kaba ïadei bad kane, ka seng Congress ha ka jylla ka la kynnoh ba u Birajit Sinha u la leh ïa ki kam kiba long pyrshah ïa ka seng bad leh donbor hapoh ka kyrdan kaba u bat. Kumba la ïathuh la ong ba u Birajit Sinha hashwa kane u la long u President jong ka seng ha Tripura.
Kumba la ïathuh ka tyllong khubor, ka kynhun AICC kan sa ai ïa ka jubab halor ka jingkyrpad jong ka seng ha Tripura hadien ka jingpynlong ïa ka ilekshon Assemby ha ki 5 tylli ki jylla jong ka ri. Ka tyllong khubor ka la ïathuh shuh shuh ba u Birajit Sinha u la sangeh ban don bynta ha ki prokram jong ka seng hadien ba u la shah weng noh kum u President jong ka seng ha Tripura ha basdang jong une u snem. Shuh shuh la ïathuh ba u nongïarap baïajan jong u u Samrat Roy ruh u la shah weng kam noh kum u President jong ka National Students’ Union of India (NSUI) ha ka jylla.
U Sinha u la leit jngoh ïa kiba bun ki thaiñ nongkyndong kiba don ha ki distrik jong ka jylla na ka bynta ban ïakynduh ïa ki nongïarap ba ïajan jong u. Ha ka jingleit jngoh la synran lang ïa u Sinha da u Roy bad da ka Sushanta Chakraborty, kaba long ka President barim jong ka kynhun ki samla hapoh ka seng Congress.
U Sinha u ju sngap jar jar ha kaba ïadei bad ki jingthmu jong u, hynrei u Roy u la ong ba ki la don ki jingïakren ha kaba ïadei bad ka jingthmu ban thaw da ka kynhun ‘Development Forum’ na ka bynta ban ïakren halor ki mat ba ïadei bad ki paidbah. Kane ka kynhun kumba la bna khubor, la ong ba ka la thmu ban mih noh na ka seng Congress bad ban thaw da kawei pat ka seng kaba thymmai. Ka seng Congress ka don ïa lai ngut ki MLA ha Tripura Assembly.
