Ki paw pylleiñ-pylleiñ ba kham kordor ka Shuki ban ïa kanokano ka Political Party, ym ju don shuh ka jingburom, jingshaniah ïa kano-kano ka Political Party. Ha ka Politic ym ju don kmie-kpa, hynmen – para, para-lok lane Nongshun, kat shaba kham paw sha khmat bad ioh bat ïa ka Bor, shata ki ïa beh ban ioh Shuki, ynda ki la mih noh na kawei ka Political Party ki beiñ kylla, prie jlia hi bad kito kiba ju mlien ban shong Shuki baheh – bahain (politician) lada kim ioh shong Shuki shuh ki kulmar jingmut jingpyrkhat bad ktah Khlieh, te, kumta katba nang mih bun ki Political Party katta nang thnem ka Iew jingïakhaïi Shuki baroh baroh ki ïa beh shata khnang ba ioh shong Shuki. Ki Paidbah nongbud ruh ki ïa beh shongshit biej tyngka ryngka ryngkat ynda la dep ka Election ki ud kylla ba ym biang ka Surok, ka Um ka Rep ka Riang, Dawai dashin bad kumta ter ter………. Shu mut dur 2 ngut ki Dy. Chief Minister bad kita ruh dei na ki Khasi, ki Garo ki sngew jar jar wat lada ki don tang 2- 3 ngut ki ngut ki ministers bad ka neh skhem bha ka Shuki jong ki. Ban da dei para Khasi la khyllem noh jrain mar ïa sdang shong Shuki CM paw noh ka jingbiej bad ba dang shykhei ka jingsarong – bishni kaba dang don haduh mynta. Ha ki snem ba la leit noh ka jingher Delhi kaba la ishyrkhei bha. Mynta ba la don kata ka Headquarter hapoh Shillong, ym donkam leit Delhi shuh kane ka jingkren ki Heh ki Hain long kum ki prie bad jliah hi. Ha ka politic ym don jinglehraiñ kren katba mon tang ban lait jynhaw na shyntur khlem pyrkhat ngam jylliew bha.
Ha ki snem ba dang thnem bha ka Seng Congress baroh baroh ki ïa tur sha ka, ynda haba ka la khyllem, ym pat ngam jyllop, ki ia mih noh bad leit tur shaba don ka Shuki, bun ki la phet na ka Seng Congress hapoh Meghaloim, kylleng ka Ri India bad kiba la ioh Shuki tang katto katne ngut don napdeng jong ki la rem noh bad don kiba leit ia snoh bad kiwei ki Political Party. Namarkata, ka jingleit jingwan Delhi ynda long kumno kumno ruh don kam hi ban leit nguh, wta la don Headquarter hangno hangno ruh. Lymda kumta ym don Pisa ka State Meghaloi. Namar ki Taxes baheh – baheh ki poi sha ka Sorkar tang shiteng bad jah noh ha lynti shiteng, na kito kiba la jah phin peit ïa ki building baheh bad bajrong, nangta sa ki Kali ba remdor kawei (1) ia ka Menkmie ban leit iew, leit buh skul khun. leit donkam shane shatai bad kawei(1) ïalade nangta don sa kawei ka spare ba kham duna dor. Te, kum ki Politician ba la nang la stad, to, da ïa thew shwa ban kren, lymda kumta phi ïa pynpaw ïa la ka jingbiej.
To, ma ngi ki Paidbah ngin ïa kyndit thiah noh ba ngim bit shuh ban tare ïa ka Pisa, ïa ka Bam pahuh – pahain, kyiad, Cigaretes, bai Dawai bai leit – wan, u Khaw, Shini, Blanket, torchlight, etc. ba ngi ju mlien ban tare, ha shwa ka general Election, khnang ba ki Surok, ki Hospital, ki skul bad kumta ter ter …….. kin bha ha man la ki Constituency, peit ïaka development ym dei ïa ka Pisa etc….
Panbor B. Lyngdoh
