Aizawl, ïaïong:
Ka jingpang African Swine Fever (ASF) ka la sdang ban ktah ha kiba bun ki bynta jong ka jylla Mizoram, ha kaba kane ka la ktah ruh ïa ki distrik ba marjan jong ka Champhai bad Saitual, kumjuh ruh ïa ka nongbah Aizawl.
Kumba la ïathuh ka tyllong khubor, la ong ba kane ka jingpang bashyrkhei ka la shim ïa ka jingim jong 174 tylli ki sniang bad sa 68 tylli kiwei pat la buh ha ka jaka ba la set kyrpang ïa ki khnang ban tehlakam ïa ka jingsaphriang jong ka jingpang sha kiwei pat.
Ka sorkar Mizoram ka la shim ki lad ki lynti na ka bynta ban tehlakam halor ka jingsaphriang jong kane ka jingpang. Kawei na ki lad ban ïada ïa ka jingsaphriang ka jingpang ka long da ka jingpyrkhing ban die ne ot doh ïa ki sniang bad kumjuh ruh ban wan kit ne leit kit sha kiwei pat ki bynta jong ka ri.
