Agartala, ïaïong:
Ka jingjur palat jong ka jingshit kyrang ka sngi ka la pynlong ïa ka sorkar Tripura ban ai shuti sha baroh ki skul na ka bynta saw sngi ka ban sdang naduh ka sngi Balang kum shi bynta ban ai jingïada ïa ki khynnah skul na kino kino ki jingshah ktah na kane ka jingshit palat jong ka sngi.
U Additional Secretary, Education (School) Department jong ka Tripura u N.C Sharma u la ong ba na ka daw jong ka jingshit palat bad ka jingbud ïa ka jingai jingmut jong ka Revenue Department, ka sorkar jylla ka la ai ïa ka rai ba baroh ki skul sorkar, ki skul jong ki riew shimet bad ki skul ba la shah ithuh ha ka sorkar kin khanglut ha kaba kan sa long haduh ka 27 tarik, Ïaïong naduh ba la sdang ïa ka ha ka 24 tarik, Ïaïong.
Baroh ki District Education Officer ki la shah bthah ba ki la dei ban pynbna halor kane ka rai sha man ki skul kiba don ha ka ki thaiñ kiba dei khmih, la ong ka hukum. Ka hukum jong ka Education Department ka dei kaba la pynmih ym slem hadien ba la phah jingthoh ka Revenue Department kaba la bthah da kaba ong ba ka Tripura ka la shah ktah na ka jingjur palat jong ka jingshit naduh ka taïew ba la lah bad katkum ka jingïathuh jong ka Indian Meteorological Department (IMD), la ong ba kane ka jingshit kan sa ïai bteng ha kine ki sngi ban sa wan. Baroh ki bor ba dei khmih hapoh ka distrik ki la shah bthah ba ki la dei ban pynlong ïa kiba bun ki jingïalap paidbah ba kin tip shaphang ka jingjur jong ka jingshit bad ki jingma kiba ap na ka bad wanrah ruh ïa ki kyndon ba bun ha kaba ïadei bad ka jingpynbiang ïa ka umbam-umdih bad ban khmih bniah halor ka jinglong jong ka suiñbneng khnang ban lait na kino kino ki jingshah ktah na ka jingshit palat jong ka sngi.
