Imphal, ïaïong:
U Myntri Rangbah ka Manipur u N. Biren Singh ha ka jingpyllait khubor lyngba ka rynsan X, u la ong ba la lap ïa u drok Brown Sugar ba la buhrieh hapoh ki pathaw.
Kane ka jinglap ïa kine ki drok ka la long ha ka por ba la pynlong ïa ka jingkhmih bniah kumba ju long ba la leh da ki shipai ïada ri, ha kaba kane ka la pynlong ban ïoh ban kurup ïa u drok bad ïoh ruh ban kem ïa arngut ki briew.
Kumba la ïathuh ka tyllong khubor la ong ba ki pulit ki la bat ïa kawei ka trok Bolero Pick-up, kaba rong lieh bad kaba don ïa u Registration Number AS 11DC-3506.
Kane ka jingïoh ban kurup ïa u drok ka la long katba kane ka kali ka dang wan na Tipaimukh in Pherzawl District, Manipur, bad thmu ban leit sha Cachar kaba don ha Assam.
Hadien ba la pynlong ïa ka jingkhmih bniah, ki heh pulit ki la lap ïa 30 song ki Soap Capsule ba la thep hapoh ki pathaw.
Ka jingkhia jong kine ki Capsule bad ki pathaw kumba la antad ki la don 363.45 grams, lait noh ka jingthew ïa kine ki Capsules.
Ïa kine arngut ki briew kiba la don ha kane ka kali, la tip kyrteng kum u Abdul Mannan Mazumder bad u Khalil Ulla Barbhuiya, kine ki la shah kem bad shah phah sha ka jaka treikam jong ki pulit ka Jiribam na ka bynta ban bteng ïa ka jingtohkit bad ban pyndep ïa ki jngdonkam katkum ki kyndon aiñ.
U Myntri Rangbah u la ai jingïaroh ïa ki shipai jong ka kynhun 39th Assam Rifles (AR) bad ki pulit jong ka Jiribam halor ka jinglah jong ki ban khanglad ïa ka jingkhaïi beaiñ ïa u drok.
U la ai mynsiem shuh shuh da kaba ong ba ka la dei ban don borabor ka jingïatreilang na kabynta ban ïakhun pyrshah ïa ki kam khaïi drok bad ban ïada bad ai jngshngaiñ ïa ka imlang ka sahlang.
Ha kaba ïadei bad kane, ki shipai Assam Rifles bad ki pulit ka Jiribam ki la pyntreikam borbah ha kaba ïadei bad ka jingïakhun pyrshah halor ki kam khaïi drok.
Ki la lah ban wanrah ïa ka jingjop naba ki la ïoh ban kurup ïa u drok ba bun. Ka dor jong u drok ba la ïoh ban kurup ka la poi sha ka `. 3.5 klur.
Kane ka jingpyntreikam jong ka kynhun shipai ïada ri ka la long ha ka 24 tarik, Ïaïong.
