Ranchi, ïaïong:
Ka seng Jharkhand Mukti Morcha (JMM) ha ka sngi Palei ka la pynbna ba ka Kalpana Soren, kaba dei ka kurim jong u Myntri Rangbah barim jong ka jylla u Hemant Soren, kan sa ïakhun ïa ka ilekshon shiteng samoi na Gandey Assembly konstitwensi.
Ka konstitwensi kaba don ha ha Giridih distrik ka la sah thylli hadien ka jingiehnoh kam jong u MLA ka seng JMM u Sarfaraz Ahmad.
Ka jingthep vote na ka bynta ka ilekshon shiteng samoi sha Gandey Assembly konstitwensi kan sa long ha ka 20 tarik, Jymmang ha ryngkat ka Parliamentary Elections ha ka jylla.
Ka Kalpana, kaba shu shong ïing kaba la pyndep ïa ka MTech bad ka MBA, ka la pyndep ïa ki jingpule ha ki skul na Baripada kaba don ha Mayurbhanj distrik jong ka Odisha bad ka la leh ïa ka Engineering bad MBA Degrees na ki jaka pule bapher bapher kiba don ha Bhubaneswar.
Ka jingrung jong ka ha ki kam saiñ pyrthei ka la sdang ha ka sngi ba la rakhe ïa ka jingdap 51 snem ka jingseng ïa ka JMM ha Giridih distrik ha ka 4 tarik, Lber, haba ka la pynshisha da kaba ong ba ka jingïasuhbuit sniew ka dei kaba la wanrah da ki kynhun pyrshah naduh ba la don ka sorkar synrop ba la lamkmat da u Hemant Soren ha u snem 2019 bad ka Jharkhand kan sa ai ïa ka jubab kaba biang ban tip mano ba la pynlong ïa u kurim jong ka ba un shah set patok.
U kurim jong ka u Hemant Soren u la shahkem ha ka kynhun Enforcement Directorate ha kaba ïadei bad ka jingshah kynnoh donkit ha ka jingkamai ïa ka spah bymhok kaba don jingïadei bad ka kam bamsap kaba la mih na ka jingïadie-ïathied jaka ha ka 31 tarik, Kyllalyngkot.
