Bertina Lyngdoh
La ju ong, ba ki khun ki dei ki jingai sngewbha u Blei. Bun ki ong, ba katta nang bun khun, katta ruh ka ïing ka nang shngaiñ. Ka jingdon saw, san ne palat ki khun, lehse ka pyndik ïa ki kmie ki kpa mynba dang rit, hynrei ynda ki la heh ki la san pat, ka pynsuk ha ka ban pynbynta kam bynta jam ïa ki. Lada ïa bun shipara, ka kur ka jait ruh ka roi khamtam haba ïa dei bad ki khun kynthei namar katkum ka riti ka dustur u Khasi, ka kynthei ka ioh ïaka kur ka jait. To ngin sngewthuh ïa ka jingmut jong ki khun khliengkpoh.
Ha ka kyntien Khasi, la ju tip ïa ki khun khatduh ki khun khliengkpoh. La ong ïa ki khun khliengkpoh namar hadien jong u ne ka, ka kmie kam shym la ïoh para shuh na ka bynta jong ki. Ha ka riti ka dustur u khasi, ki khun khatduh ki dei ki nongïoh pateng kata khambun ban ïa kiwei pat na ki shipara. Ka ju dei ruh kata ka dustur, ba ki khun khatduh ki dei ma ki ban shong ban sah bad la ki kmie ki kpa ban sumar bad peit ïa ka jinglong tymmen jong ki. Hooid, kane ka dei katkum ka dustur u Khasi, hynrei haba ïatyngkhuh kam pat, lehse kam lah long ïa baroh ki khun khatduh. Kum ka nuksa, lada ka khun khatduh, ka ïahap kurim bad uba na shawei ka jylla, ka shnong, hynrei namar ba ka kam u nongbsa ka ïing, kam banse ban ieh ïala ki kmie ki kpa kumjuh ruh kane ka long ïa u khun khatduh shynrang. Ba bym biang ha ka jinglong briew, bad ba klet ban pyrkhat jngai, bunsien ki kmie ki kpa kim kham ieit ïa ki khatduh ban ïa ki khun nyngkong, ne khun pdeng. Teng teng, kum ki kmie ki kpa ki ju khmihlynti da ka jingbha na ki khatduh, phewse, don kiba mad ïa u soh-ngang na ki. Ki khatduh ruh namar kila tip shai ba ki dei ki khatduh kin ioh ban lehmon, na ki kmie ki kpa. Lehse, ka jinglong khatduh jong ki, ka pynsarong ïa ki ba ki kmie ki kpa ki kham ieit, kham ai mon, lane kham pynhun kumta, kiba bun naki khatduh, ki ju long kiba pher ha ka jinglong jong ki.
Te namarkata, kum ki kmie ki kpa, la dei keiñ ban thymmai noh kata haba ïa dei bad ka jingieit ïa ki khun. La khun khatduh, khun pdeng, ne khun phrangsngi, ki dei hi ki khun. Ai kajuh ka jingieit, kajuh ka jingbahkhlieh ïa baroh ki khun ban lait na ka jingïapra shipara, dei mangi hi ki kmie ki kpa ban pynïatylli ïaki. Ngi dei mangi ban tehsong ïaka jingieit hapdeng baroh ki khun. Ban ieit ne noh mynsiem shiliang barabor kam ju bha namar teng teng ïa kiba ngi la ieit bha bad sha-niah, ngim ju ioh ka nongkylliang kaba bha. Kumta, kum ki kmie ki kpa to ngin long ka jingkyrkhu ïa ki khun ym tang ïa i wei ne ar. Da kaba ngi leh kumne, kan wan rah jingbha ïa baroh shipara kumjuh ïa ka ïing ka sem hi baroh kawei.
