Shillong, Jymmang 01
Ka Shillong Lajong FC ka la jop ïa ka Nangkiew Irat da 2-1 kol ha ka lympung ïalehkai Shillong Premier League 2023 ha ka Sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba u Meban-nangkiew Thabah bad u Samchaphrang Lato na ka bynta ban pynlong ïa ka Lajong ban jam sha ka kyrdan ba-ar. Katba u Prashant Chettri u la lah ban pynphai kylla na ka bynta ka Nangkiew Irat. Kine ki long ki kol kiba nyngkong eh ïa kine baroh lai ngut ki rangïalehkai ban ïoh thep kol ha kane ka aïom.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei ka Lajong ka la ïoh ban pynkhih jar nyngkong eh lyngba u Mebannangkiew ha ka minit kaba 25. Kane ka shi kol ka la ïai neh haduh kaba kut jong ka kylla step na ka daw ka jingbym lah ban pynphai da ki rangïalehkai ka Nangkiew Irat.
Hadien katto katne por ba la bteng ïa ka jingïakhun jong ka kylla miet, ka Lajong ka la pynbud biang ïa ka kol kaba ar lyngba u Samchaphrang ha ka minit kaba 69 na ka bynta ban tam da 2-0 kol bad kane ka la wan lyngba ka jingïarap pynbuh da u Babysunday. Ha shwa ban kut ka jingïalehkai, ka Nangkiew ka la lah ban pynphai kylla shi kol lyngba u Prashant ha ka minit kaba 84 hashwa ba kan mad ïa ka jingshah rem.
Lyngba kane ka jingjop kaba san ka la pynlong ïa ka Lajong kaba la ïoh rung lypa sha ka semi final jong kane ka lympung, ka la jam sha ka kyrdan ba-ar bad kamai 15 point. Kane ka kynhun ka la tam da 2 point ïa ka Mawlai kaba la hiar sha ka kyrdan balai. Katba ka Nangkiew Irat ka dangïai sah ha ka kyrdan ba shatrai na ka bynta ban ïaryngkat mar 3 point bad ka Nongthymmai SC.
Na ka daw ka jingpynsangeh ïa ki ar tylli ki jingïalehkai dangshen, na ka liang ka SSA ka la pynkhreh ban pynlong ïa kitei ki jingïalehkai ha ka sngi Thohdieng bad sngi Saitjaiñ ki ban long ha ka por 3:15 janmiet.
Kine ki jingïakhun kin long hapdeng ka Langsning FC pyrshah ïa ka Ryntih SC ha ka sngi Thohdieng bad ha ka sngi kaba bud ka Mawlai kan ïakynduh pyrshah Nangkiew Irat.
