Agartala, Jymmang:
Ki la don kumba 8 ngut ki nong Bangladesh kiba thmu ban leit sha Pune, kynthup ïa 7 ngut ki longkmie, ki la shahkem ha ka sngi Saitjaiñ na ka jaka sangeh rel ha Agartala namar ka jingwan rung beaiñ jong ki sha kane ka ri, la ïathuh ki pulit.
Ki pulit jong ka Government Railway Police (GRP) bad ka Railway Protection Force (RPF) ha ka jingïatreilang jong ki; ki la ïoh ban kem ïa kine ki 8 ngut ki nong Bangladesh ha ryngkat uwei u riewpaidbah jong kane ka ri uba la thmu ban pynkiew ïa kine ki briew ha ka rel sha Kolkata kaba dei na Kanchanjunga.
Kine kiba la shahkem ki la ïathuh ha ki pulit ba na Kolkata, ki la thmu ban leit sha Pune kaba don ha Maharashtra na ka bynta ban im jakpoh da kaba leit wad kam sha kylleng ki jaka.
Hashwa kane, kata ha basdang jong ka taïew ba la lah ki la don kumba 11 ngut ki nong Bangladesh, kynthup ïa arngut ki longkmie bad lai ngut ki khynnah, kiba la shahkem ha ka shnong kaba don ha Dhalai distrik jong ka Tripura ha kaba ba ki dang thmu ban leit phai biang sha Bagerhat distrik kaba don ha Khulna Division jong ka Bangladesh.
Kumba la ïathuh da ki pulit, la ong ba kine ki briew ki la rung sha West Bengal khlem da don ïa ki kot sakhi kiba biang ne kiba dang treikam ha ki lai snem ba la leit bad ki la leit sha Bengaluru na ka bynta ban leit wad kam.
