Imphal, Jymmang:
Kum shi bynta ban pynpaw ïa ka jingdonkam ha kaba ïadei bad ka jingpynbun ïa ki kynhun pahara ha ki thaiñ ba ju kham jia ki jingïakynad tad haduh ban da leit phai pura ka jingsuk, ka kynhun United Committee of Pukhao and Makeng Dolaithabi Gram Panchayat ka la buh ka jingkyrpad ïa ki heh ba dei khmih ba kim pat dei ban weng ïa ka kynhun jong ki shipai BSF kiba la shah pyntreikam ha ka shnong Purum.
Kane ka kynhun ka la buh jingmaham ba kan pynlong ïa ka jingïakhih lada jia ba ym lah ban pynurlong ïa ka jingdawa ba la buh.
Ha ka jingai jingkren ha ka jingïalang bad ki nongthoh khubor, u President jong ka kynhun, u Thokchom Sanjoy Singh u la ong ba naduh ba la sdang ka jingïakynad kaba jur ha ka 3 tarik, Jymmang jong u snem ba la lah, kiba bun ki shnong kiba don ha Imphal East distrik ki la shah thombor ha ki kynhun jong ki riewkieng atiar. Hynrei da ka jingpyntreikam ïa ka kynhun BSF-37E COY ha ka shnong Purum ki jinglong jingman ki la ïaid beit ïaid ryngtih hapoh ka jinglah ban tehlakam jong kine ki kynhun shipai.
Ha kaba ïadei bad kane, ka sorkar pat ka la thmu ban weng noh ïa ka kynhun shipai wat hahswa ban leit phai ka jingsuk kane ka buh jingkhuslai ïa ki nongshong shnong ba ïoh sdang biang ka jingshah thombor.
