Aizawl, Jymmang:
Ki la don sa kumba 65 ngut ki poiwir, kynthup ïa 27 ngut ki longkmie bad 24 ngut k khynnah, kiba la rung sha Lawngtlai distrik kaba don shaphang Shathie jong ka Mizoram na Chittagong Hill Tracts (CHT) kaba don ha Bangladesh, ha kine ki ar sngi ba la leit, la ïathuh ki heh ba dei khmih. Katkum ka kyrwoh khubor, la ong ba kine ki poiwir ki la leit sha Mizoram hadien ba ki la ïakynduh ïa ki jingeh na ki jingïakynad ba la jia hapdeng ki shipai Bangladesh bad ki kynhun kieng atiar khamtam ha ki jaka lum jong ka thaiñ Shatei-Mihngai jong ka ri ba marjarn.
Kine ki poiwir ki la pynlong jaka sah ha ka shnong Vathuampui bad ki nongshong shnong ha kane ka jaka ki la pynbiang jingbam bad kiwei pat ki jingdonkam na ka bynta jong ki. Da kane ka jingdon sa kine kiwei pat ki poiwir kiba la leit na CHT ha ka jylla, baroh ka jingdon jong ki ka la kiew sha ka 1,433 ngut.
Ha ka 10 tarik, Jymmang, ki la don kumba 127 ngut ki poiwir na CHT kiba la rung ha Mizoram bad sah ha 6 tylli ki shnong. Kine ki poiwir kiba dang wan ki dei na ka kynhun Bawm bad Pang jong ki riewlum kiba la khot ïalade kum ki Kuki-Chin. Ki poiwir na CHT ha kaba nyngkong ki la phet sha Mizoram ha u Naiwieng jong u snem 2022 hadien ba la mih ka jingïapynibor kaba markylliag hapdeng ki shipai Bangladesh bad ki kynhun kieng atiar, kiba la ïakhun pyrshah na ka bynta ban phiah jylla na ka bynta ki riewlum ha CHT. Ha kaba ïadei bad kane, hadien ka jingsynshar jong ki shipai ha Myanmar ha u Rymphang jong u snem 2021, ki la don palat 34,350 ngut ki briew na Chin jong ka ri ba marjan kiba la phet sha Mizoram bad kine ki la buhai shnong ha baroh 11 tylli ki distrik jong ka jylla.
