Agartala, Jymmang:
Kum shi bynta ban ai jingïada ban ban ïaleh pyrshah ïa ka jingpang khieshoh, ka National Insect-Borne Disease Control Scheme ka la pynkhlaiñ ïa ka jingpyntreikam ha kylleng ki distrik jong ka Tripura.
Hapoh ka jingïalam jong ka Department of Family Welfare and Preventive Medicine, ka jingïatreilang ka don jingthmu na ka bynta ban khanglad ïa ka jingsaphriang sted jong ka jingpang khieshoh lyngba ka jingbud ïa ki kyndon ba la buh. Ki nongshong shnong ki la shah bthah ba kim dei ban kheiñsting lada ki shitom.
Ka la don ka jingsam ïa ki Long-Lasting Insecticidal Net (LLIN) ha kylleng ki distrik. Kumba la sakhi, la ong ba ha West Tripura la pynbiang ïa kumba 540 tylli ki jar, ha kaba la bud da 12,845 tylli ha Sepahijala distrik bad 545 tylli ha Khowai distrik.
Ka Gomati distrik ka la ïohpdiang ïa kiba bun ki jingmang ïa ki jar ha kaba ka la long da kumba 79,024 tylli, kata ha North Tripura la ai kumba 16,706 tylli ki jar.
Shuh shuh la ïathuh ba ha Unakoti distrik la sam ïa kumba 1,178 tylli ki jar bad ha South Tripura la sam ïa kumba 1,29,087 tylli.
“Ha kaba ïadei bad ka jingsam ïa kine ki jar, ki nongtrei Asha ki la leit jngoh shaman ki thliew ïing na ka bynta ban pynsngewthuh paidbah halor kane ka jingpang. Kine ki nongtrei kiba ai jingïarap ha ka liang ka koit ka khiah ym tang ba ki la sam ïa kine ki jar hynrei ki la pynlong ruh ïa ka prokram Test snam khnang ban lap ïa ki briew kiba shah ktah ha ka jingpang khieshoh”, la ong u heh ba dei khmih ha ka liang ka koit ka khiah.
U heh ba dei khmih u la ong shuh shuh, “Lyngba ka jingshim snam bad khmih bniah ïa ki nongmuna, yn sa lah ban lap ïa ki briew ba ki shah ktah ne kim shah ktah ha ka jingpang bad lada dei kiba la shah ktah ha ka jingpang ka jingsumar kan ïaid shakhmat.
Shuh shuh u la ong ba ki nongtrei Asha ki la trei borbah ha kaba ïadei bad ka jingpynbna ïa ki khuobr shaphang ka jingpang khieshoh bad kumno ban leh ban ïada na ka.
Ha ryngkat ki jingai jingmut ki la hikai ruh ïa ki longïing ba ki la dei ban ïakhun tyngeh ha kaba ïadei bad ka jingpang bad ki la batai shai halor ki kyndon kumno ban ïada na ka.”
