Bertina Lyngdoh
Na ka trep ksiar trep rupa, bad na ka doh ka snam la pynim ïa phi. Da ka jingieit ba janai, la pynheh pynsan ïa phi bad da ka syep la trei shitom ban pynbam bad pynbiang pynbit. Haba ïam, ïa bynñiaw lang, kumjuh ruh haba rkhie, ïa sammut lang. Haba shlei ne thnam slap, bad haba ki umpohliew ki bthei, bad ba um ki tuid shaid-shaid, kumta ka jingkmen na ki. Kumba ki syntiew ki skud, ki sdang shylluit bad phuh, kumta keiñ jingkmen na ki, haba i ïa ka jingnang heh nang san ïa ka ban nang ïai tyllun. Te kumta, kumne shi kumne kin nang ïai tyllun ka jingkmen ha ki.
Uwei, ar, lai, ne bun, hynrei uwei te un don uba kham pher shi ïing shi sem. Uta, u dei u khun uba tip ïa ka ïoh ka duh la ïing la sem. U ju dei ruh uba kham stad ha ka pyrkhat ka pyrdaiñ. Une u dei ruh uta uba palei bad hun ïa kaei kaba ka kmie u kpa ki don. Wat lada tang shiphong arphong makna u don ruh un don, naba u tip ba um kotbor ban ïoh palat ïa kata. Barabor u ju bad kyndiang ïa ka ktien ki kmie ki kpa bad long uba kmen na ka bynta jong ki. Kum uba im bad ha ka jingnang heh nang san, bun ki jingpynshoi kiba ïaleh ban ïalam bakla ïa u, hynrei ka jinglah jong u ban kiar dalade ïa kita baroh ka long ka jingkmen ïa ki kmie ki kpa. Uba pyndem ïalade wat lada u tip pylleiñ ba ki kmie ki kpa ki la bakla une keiñ u dei ïa uba hadien habud un long ka umpohliew rupa ïa ki kmie ki kpa. Ka burom ka koh-nguh, bad ka jingdon ryngkat lang jong u ha ka shitom shipa ki kmie ki kpa, ka dei ka nongkylliang jong ki kmie ki kpa. Uba wad lad wad lynti dalade ban im lang, u dei keiñ uta uba pynsuk ïa shiliang shiliang ka tyrpeng ki kmie ki kpa.
Kumta, ki khun ki long kum kine ba la kdew haneng, kata ka dei ka umpohliew rupa kaba ki kmie ki kpa ki ïoh mad ïa ka. Haba dih ïa ka um ba shngiam bad ba ka pynjah sliang ïa ngi kumta ka dei ka jingkmen junom ki kmie ki kpa haba u khun u long uba tipbriew-tipblei. Kumta, sdang na la rympei ban ieit, ban pyndep la ki kamram kum ki kmie ki kpa khnang ban ïoh khnang ban ïoh ïa ki khunblei ba shisha. Kaei-kaei baroh, ka dei na la rympei, khamtam haba kane ka juk ba mynta, jynjar ban ïoh ki khun kiba tieng burom i’u Blei bad la kmie la kpa. Kumta, to long ki nongsharai ba bha ban ïoh ïa ki nongbud kiba bha.
