Guwahati, Jymmang:
Uwei u nongïalam jong ka seng BJP ïa uba la tip kyrteng kum u Suranjit Das Choudhary bad hynriew ngut kiwei pat ki la shah pynngat ha ki kyndon aiñ halor ka jingshah kynnoh ba ki la thmu ban pynïap bad thombor ïa u trai jong kawei ka dukan die kyiad kaba don ha Cachar jong ka jylla Assam.
Kane ka jingjia ka la jia ha ka miet jong ka sngi Saitjaiñ, ha kaba utei u trai jong kawei ka dukan kyiad, u la shah thombor ha u Choudhary bad ha ki nongbud jong u. Haduh ba la thoh ïa ka khubor ym pat tip ïa ka daw tynrai halor ka jingshah thombor jong une u trai jong kane ka dukan die kyiad.
Hadien ba la jia kane ka jingshah thombor, une u lanot u la buh da ka jingujor ejahar ha Silchar Sadar Police Station. Ki pulit ha kaba ïadei bad kane, ki la buh jingthoh bad pynngat ha kiba bun ki kyndon jong ka Indian Penal Code (IPC), kynthup hapoh ka kyndon 143, 341, 326, 379 bad 307 pyrshah ïa kine kiba la shah kynnoh.
U Suranjit Das Choudhary u la long u nongïalam ba shimet jong ki Dalit hapoh ka seng BJP, ha kaba u la paw kyrteng ruh halor ki kam beaiñ jong u ha ki por ba hashwa. Ha u snem ba la lah, la ïoh jingtip ba u la shah weng na ka liengsuiñ kaba na Kolkata ha Silchar Airport hadien ba u la shah pynshisha ba u la byrngem byrsit ïa ka Air Hostess.
