Raphael Warjri
Haba la dawot ka Dorbar Blei ba nyngkong, la ïa poi tiap baroh ki parajynthaw bad hangta la mih ka rai ban phah ïa ki khathynriewtrep khathynriewskum ban synshar halor ki laiphew jynthaw ha pyrthei. Na kita ki khathynriewtrep khathynriewskum, khyndaitrep khyndaiskum ki korbar ha bneng kum ki mynsiem riewblei bad hynñiewtrep hynñiewskum ki korbar ha pyrthei kum ki bynriew kiba don ka met ka phad, ka doh ka snam kum ki parajynthaw baroh. Ha kata ka juk jong ka aïom ksiar ba dang synshar ka hok ka shikyntien, ki khyndaitrep khyndaiskum bad ki hynKumta la dawot ka Dorbar Blei ba nyngkong bad hangta la mih ka rai ban phah ïa ki khathynriewtrep khathynriewskum ban synshar halor ki laiphew jynthaw ha pyrthei. Na kita khyndaitrep khyndaiskum ki korbar ha bneng kum ki mynsiem bad hynñiewtrep hynñiewskum ki korbar ha pyrthei kum ki bynriew ki ba don ka met ka phad, ka doh ka snam kum ki parajynthaw. Ha kata ka juk jong ka Aïom Ksiar ki hynñiewtrep hynñiewskum ki dang ïa leit ïa wan, ïa kren ïa khana lyngba ka Jingkieng Ksiar U Sohpetbneng ryngkat bad ki khyndaitrep khyndaiskum. Na ka daw ba baroh ki jynthaw naduh ki jynthung jyntep, ki maw ki dieng, ki mrad ki mreng, ki sim ki doh, ki dohkha dohpnat, ki khñiang ki ksiah, ki wieh ki ksaiñ ki ioh la ka jingim laitluid, kumta don napdeng kita kiba khlem da shahshkor than ïa ki bynriew hynñiewtrep hynñiewskum. Kiba kham pihuiñ tam ïa u bynriew, dei u khla u thlen, namar ba ki dei ki longsan mansan ha ka dorbar blei. Kane ka jingïakhing hapdeng ki parajynthaw, khamtam ban ïaleh pyrshah ïa u bynriew ka la nang rasong manla ka por, haduh ba la donkam ban khot sa da ka Dorbar Blei ba-ar.
Ka maïa blei bad ka pharshi ba phalang na ki khanatang ka long kaei kaei ka ba ki briew ha ka juk mynta kim dei eh ban shim ba ka long ka ba shisha. Kaba khuid mynsiem bad sngur mynsiem ka long ba dei ba ym tip thikna ïa ka ba shisha, ha ka ba na kata ka daw ba mih ka Ap Jingong naduh ba la dkut noh ka jingkieng ksiar u Sohpetbneng bad khyllem u Diengiei. Ki khanatang ki batai ba myn kulong kumah ki dieng ki siej, jynthung jyntep, ki mrad ki mreng bad kiwei kiwei ki jynthaw ki dang ïakren parajynthaw bad ki lah ban ïa kren ïa khana bad u bynriew. Ha kane ka juk mynta ka long ka ba jwat ban pdiang ïa kata, kumta kam long kaba eh ban ong ba ym tip thikna ïa kaba shisha bad ai ba kita ki khana kin long tang kum ki maïa bad ki pharshi ki ban phalang ka khubor kaba shynna ha ka juk mynta. Kaba phylla ka long ba don ki ba ngeit skhem ba ki bynriew ki hiar na bneng lyngba ka jingkieng ksiar u Sohpetbneng khlem sabut kiba thikna, bad la pynshong nongrim tang ha ki snap na ka jaka bad ki khanatang. Kaba artatien ka dei ban sah umdum kumba ka long bad ym dei ban pynbor ïa ki paidbah ban ngeit ïa kaei kaei kaba khlem sabut. Ki jingbatai ïa ki jingjia ha ki khanatang ki dei ban sah tang kum ki khana ki ba don ka maïa blei bad ka pharshi ka ba kdew kum ki jingsneng ïa ka longbriew manbriew.
Haba phai sha ki parabangeit jong ki balang Khristan pat, ki kloi ban ngeit skhem ba u Noah u kad ïa ka duriaw da ka bor phylla na u Blei, hynrei kim ngeit pat ba u ryngkew u ïada ïa ki briew na kano kano ka jingma da ka bor longblei ba maïa. Ki ngeit ba kylla mawmluh ka tnga u Lot ha ba phaidien sha ka shnong ba la tim, hynrei kim ngeit ba kylla maw ki masi u Miat Rynsut jong ka Syiem Latympang. Ki ngeit ïa u soitan Lucifer ha dujok, hynrei kim ngeit ïa u thlen wat lada don ki sabut ba shah khñiot mynshohnoh. Ym sngew shlan ban kdew ïa ki kam phylla u Jisu namar ba ka lah ban pynmong jur ïa ki parabangeit Khristan ba ki ngeit blei. Haba pynsngew kumta ka kdew ba katkum ka jingngeit salonsar jong ka longblei manblei ka saiñpyrkhat bad saiñniam Khasi, ka phalang ba kino kino ki ba im bha ha lade bad leh bha ïa la ki parabynriew ki dei ka snap longblei manblei. Kata ka mut ba kino kino ki riewblei ba bha kiba la im ha kane ka pyrthei naduh mynnor kum u Jisu, u Ram, u Krishna, u Shiva, u Buddha, u Guru Nanak bad kiwei kiwei ki dei ki snap longblei manblei ba ha ka jingngeit Khasi la nam Blei, U Blei, Ka Blei, Ki Blei. Kata ka dei ka saiñpyrkhat saiñniam kaba kdup salonsar ïa ki paidbynriew shityllup ka pyrthei ba ym dei ban kam ba U Blei Khasi u dei la ka jong, kumba kam kiwei kiwei ki niam khamtam ka niam Muslim. Nakata ka daw la tyngkan khnang ban nam ïa u Muhammad kum u riewblei namar ba ki khana niam pateng ki kdew ïa ki kam bymman kiba ym sngew dei ban da jer hangne. Lehse la dei ban pdiang salonsar ba uta u Allah jong ki Muslim, u ba ryngkat kum u Yaweh, u Jehovah jong ki paidbynriew Israel, kumjuh ruh u Ram Krishna, Shiva ter ter jong ki riewngeit Hindu, u Buddha jong ki riewngeit Buddhist, u Guru Nanak jong ki riewngeit Sikh, u Mahavir jong ki riewngeit Jain bad kiwei kiwei ki riewblei jong kino kino ki niam ha pyrthei, haba shim kyllum lang ki dei ka snap longblei manblei ba ha ka Khasi la jer la nam Blei, U Blei, Ka Blei, Ki Blei. Lada ngam jylliew ha kata ka tyllong jingngeit riewblei jong ki paidbynriew Khasi, lah ban kam ba ka long ka ba ïar bad maian haduh katta katta ba ka lah ban kdup ïa ka longbynriew manbynriew ha pyrthei shityllup.
