Bertina Lyngdoh
Ka jingbym pynsngew, lane ka jingmynthi, suki pa suki ka pynshrai ïa ka mynsiem kaba la ïai ap ha ka jingkhmih lynti ïa kaba bha. Ka jingkuman ïa kaba la ud la nam bun bunsien, ka pynjah noh ïa ka mynsiem ba ïaishah. Ka jingmutlop wat haba la ïohi bad tip, ka pynlong ban shim noh da ka rai ne sienjam ba kham tyngeh ba shkor te kan sngew bad ba khmat kin iohi. Te namar kine, sa mih ki kam pynshitom ïalade
La jied ïa phi namar ka jingshaniah, bad jingkyrmen ban trei bha ha baroh ki liang. La jied la mang ruh ïa phi, da ka jingkyrmen ba phin pyndep ïa kaba dang sah. Ka jingwan rah ïaphi ha ka burom namar ka jingngeit ba phin pyndap ïa ki jaka ba suda. Ka jingailad biang sa shisien kynthi ka mut ba ki don ka jingshaniah ba phin pynurlong ïa ka jingbha jong baroh lang. Haba ki jied bad pynwan ïa phi ha ka bor, ka mut ruh ba ki shaniah ba phin nang pynroi ïa ka roi ka par. Kumta, haba la wan haka bor, bad ba la pynkup bor ïaphi, kam bha ban kiew skong bad klet noh ïa ka jingshaniah uba bun ba la ai ha phi. Haba la ïoh ka bor kum uta u nongsharai wat mynthi wat kuman haba la pynsngew pyni sha phi. Ka jingmutlop bad ka jingleh la kum ki matlah, ka pynlong pat ïa kiba kin shim noh da ki sienjam kiba tyngeh kum ka jingshahthngan kaba khlem buh pud kata kaba ktah ïa ka koit ka khiah. Hato phi ju pyrkhat mo ba kane ka jingleh ka long kaba lehraiñ khamtam haba kiwei ki para ri, para jylla, ki tip ki bna bad i shaphang kane tang namar ka jingbym pynurlong ïa kaba la ud la nam da ki katto katne por. Kane ka jingpynshitom ïalade ka pynpyrkhat bad pynsyier lem ruh khamtam ïa ki nongkyrshan kiba bun. Ka long ruh kaba sngewsih, ba la hap ban shim ïa kum kine ki sienjam wat ha ka jingbym bha ka jinglong jingman ka mariang tang ban bit ban biang u paid balang ba bun. Kane ka pyni ba katno ka pang ka mynsiem haba la duh noh ïa ka jingshaniah.
Namarkata, ko kiba don ka bor, to sngew to sngap lem ïa u paid uba rit ha ka bor. Wat ai ba ka bor kan jah klep noh ha ka bor ka pisa. Kynmaw ba ka burom jongphi dei na kiba la shaniah haphi. To long kiba plie ïalade ba ki nongkyrshan kin ïoh ban pynsngew bnad pyni sha phi.
Bad la ka jubanlang, ban ïoh shakri bun ki lynti kum u nongsharai ba bha. Kynmaw ruh ba tang ki ktien kim ju long eiei, hynrei ki kam ba paw ki pynlong keiñ ban ïoh biang ïa ka jingshaniah ba pura.
