Kolkata, Jylliew:
Shi sngi hadien ka jingshah pynïap jong u nongbud ka seng BJP ha Nadia kaba don ha Krishnanagar konstitwensi ha West Bengal, ka la don ka jingpynjari da ka kyndon 144 kaba la pyntreikam ha ki 17 tylli ki bynta kiba don ha Sandeshkhali bad kane ka la lah ban tehlakam ïa ki jinglong-jingman ha baroh ki konstitwensi hashwa ka jingñiew vote.
Kumba la ïathuh ka tyllong khubor kaba la wan na ka Election Commission la ong ba kin sa don kumba 400 tylli ki kynhun jong ki puliti sorkar jong ka tnat Central Armed Police ki ban sa shah pyntreikam haduh ka 19 tarik, Jylliew kum shi bynta ban tehlakam bad ban khanglad ïa ki jingjia ïakynad hapoh ka jylla.
Kumba la sakhi, ka EC ka la dep ban pynbiang lypa ïa ki lad jingïada haman ki jaka ñiew vote ha kaba ka la pyntreikam ïa kumba 92 tylli ki kynhun jong ki shipai ïada ka sorkar kmie kaba don ïa 2,525 ngut ki pulit ka jylla.
Ha Kaliganj, u Hafijul Sheikh u la shah siat bad hadien kane u la shah dung ar sien ha ki nongbud jong ka seng Trinamool. Une u nongbud jong ka seng BJP u la shah khrai khlieh ruh bad ïa ka met jong u la rah sha kawei ka jaka. Ha ka por ba la jia kane ka jingjia, u Sheikh u dang dih sha ha kawei ka dukan kaba don ha ka shnong jong u kaba jngai tang shipdah maw na ka ïingsah jong u.
