New Delhi, Naitung:
Ka seng Cockroach Janta Party (CJP) ha ka sngi Thohdieng, ka la pynshisha ba la khang ïa ka internet ha kylleng ki jaka jong ka Jantar Mantar jong ka nongbah Delhi, ha kaba ki nongkyrshan jong ka, ki la pynlong ïa ka jingshong kyllaiñ myngngor, bad ka la kam ba katei ka jingleh jong ka, ka pyni ïa ka jinglah ban don biang ka jingpynibor jong ki pulit pyrshah ïa ki nongïakhih kiba dang bteng ïa ka jingïakhih.
Ha ka jingthoh halor ka rynsan X, u Abhijeet Dipke u nongseng jong ka CJP u la ong, “Ka la don ka jingkhang ïa ka internet ha Jantar Mantar. Ka sorkar ka la thmu biang ban leh da kaba tyngeh?”
Ha ka jingthoh ba kyrpang, u Dipke u la kyrpad ïa ki pulit bad ki shipai kiba la buh ha katei ka jaka ba la pynlong jing ïakhih ba kim dei ban pyndonkam da ka bor pyrshah ïa ki nongïakhih.
“Kyrpad sha ki pulit bad ki shipai ba la pynjari ban pynduhjait ïa ka jingïakhih. Wat kohnguh ïa ki hukum be-aiñ kiba hukum ïa phi ban shoh ïa ki nongïakhih kiba shida. Kane ka dei ka jingtynjuh jong phi ruh kumjuh. Hato phin ïeng bad ki paidbah, ne bad ki nongsynshar donbor,” u la thoh.
Kitei ki jingkynnoh, ki mih ha ka por ba ka jingshong kyllaiñ myngngor ha Jantar Mantar, ka la rung sha ka sngi kaba lai, hadien ka jingïaid paidbah ‘Sansad Chalo’ jong ka 20 tarik u Naitung, ha kaba ki pulit ka Delhi, ki la pyndonkam da ki lathi bad ki lyer pynsat khmat ban khanglad ïa ki nongïakhih ban ïaid sha Parliament.
Ka CJP ka la kynnoh ba ki pulit ki la pyndonkam da ka bor palat ha ka por ba ki pynlong ïa ka jingkhynra, katba ki pulit ka Delhi ki la pynskhem ba ki la leh hadien ba ki nongïakhih ki la pyrshang ban pynkheiñ ïa ki jingpynbeit pahara.
Ka jingïakhih kaba la sdang naduh ka 20 tarik u Jylliew, ka wad ïa ka jingkitkhlieh halor ka jingkynnoh ba ki don ki jingbym beit ha ki eksamin ïakhun, ki jingpynkylla ïa ka rukom hikai, ka jinghiar shuki u Myntri ka tnat pule puthi ka sorkar pdeng u Dharmendra Pradhan, bad ka jingsiew bai lutksan na ka bynta ki longïing jong ki samla pule kiba la shah pynshisha ba ki la dkhat hi ïala ka jong ka jingim na ka jingduh jingkyrmen jong ki hadien ka jinglait tuh jong ki jingkylli eksamin.
