Rah u Yadav ïa ka mang tyngka jong u snem 2026-2027

Patna, Naitung:

U Symbud Myntri Rangbah ka Bihar uba dei ruh u Myntri ka tnat pla tyngka ka jylla, u Bijendra Prasad Yadav ha ka lah sngi U Blei u la wanrah ïa ka mang tyngka ba nyngkong jong ka jylla na ka bynta u snem mang tyngka 2026-27, da kaba tyrwa ban pynlut palat T.87,383 klur ha ka Ïingdorbar Thawaiñ.

Ka ïing dorbar kaba la pynïaid da u Lamphang ka ïingdorbar u Prem Kumar, la pynsangeh noh na ka bynta shisngi hadien ka jingpyntip ïa ka jingïap bad ka jingpynpoi ïa ka mang tyngka ba la bynrap.

Katba ki liang pyrshah ki la pynmih ïa ki jingpyrta ban dawa phah iehnohkam ïa u Myntri ka tnad pule puthi jong ka sorkar pdeng u Dharmendra Pradhan.

Katkum ka kot mang tyngka, ka mang tyngka bynrap ka long baroh T.87,383.4 klur, ha kaba T.57,077.95 klur la mang na ka bynta ki skhim ba man la u snem.

Sa T.30,265.99 klur la mang na ka bynta ki jingseng bad jingpynlut ba la kular, kynthup ïa ka tulop bad ki jinglut kiba ïadei bad kane, katba T. 39.48 klur la buh kyrpang na ka bynta ki Skhim Central Sector.

Ïa ka mang tyngka ba bynrap la buh ban shim ban mynjur ha ka ïing dorbar ha ka 23 tarik u Naitung.

Ka jingthmu ban mang na ka bynta ki skhim ba man la u snem ka kynthup ïa ka T.32,707.24 klur na ka bynta ki skhim ba la bei tyngka na ka sorkar pdeng bad T.24,370.72 klur na ka bynta ki skhim ba la bei tyngka da ka sorkar jylla.

Napdeng ki jingmang pisa ba heh hapoh ki skhim ba la bei tyngka da ka sorkar pdeng, la mang T.9,335.35 klur na ka bynta ka Viksit Bharat-Guarantee na ka bynta ka Rozgar bad Ajeevika Mission (Gramin) (VB-G RAM G), katba T.3,308.69 klur la mang na ka bynta ka Indira Gandhi National Old Age Pension Scheme.

Ka mang tyngka ka tyrwa ruh T.2,732 klur na ki spah jong ka jylla ban pyndap ïa ka jingduna ha ka bhah jong ka sorkar pdeng hapoh ka Samagra Shiksha Abhiyan.

Nalor kane, la mang T.2,780.94 klur na ka bynta ka Saksham Anganwadi bad POSHAN 2.0 Programme, bad T.2,100.11 klur na ka bynta ka Atal Mission na ka bynta ka Rejuvenation and Urban Transformation (AMRUT) 2.0.

Ha kajuh ka por, ki nongïalam ka liang pyrshah ki la pynlong ïa ka jingïakhih ha phyllaw jong ka ïingdorbar halor ka jinglait tuh ki jingkylli, kynthup ïa ka jingkynnoh pyllait tuh ïa ki jingkylli ka NEET.

Ki dkhot ka RJD bad ka CPI-ML (Liberation) ki la pyrta da ki kyntien ba pyrshah bad wah plakad ha phyllaw ïingdorbar jong ka Bihar, da kaba dawa ban phah hiar shuki noh mardor ïa u Myntri ka tnat pule puthi ka sorkar pdeng u Dharmendra Pradhan halor ka jingkynnoh ba don ki jinglait tuh ki jingkylli jong ka NEET-UG bad ka jingleh bymsuidñiew ha ka eksamin.

Ki la kynnoh ba ki jingleh bym hok ba la kynnoh ki la pynthut ïa ka lawei jong ki million ngut kiba pyrshang ha ka Medical.