New Delhi, Naitung:
Ka jingïakhih ba khlem buh por jong ka Cockroach Janta Party (CJP), ka la rung sha ka sngi kaba 35 jong ka, ha ka sngi Thohdieng ha Jantar Mantar jong ka nongbah Delhi, ha kaba ki nongïakhih, ki la byrngem ban bteng ïa ka jingïakhih jong ki, hapdeng ka jingpynkhlaiñ ïa ka jingpahara watla u Sonam Wangchuk, u la pynkut noh ïa ka jingshah thngan jong u, kaba la neh 26 sngi.
Kane ka kynhun ka la ïalam ïa ka jingïakhih kaba jai jai halor ka jingkynnoh ba ki don ki jingbym pynïaid beit ha ki eksamin, kynthup ruh ïa ka jinglait tuh jong ki jingkylli NEET, da kaba dawa phah hiar shuki ïa u Dharmendra Pradhan, Myntri ka tnad pule puthi jong ka sorkar pdeng bad ban don ka jingkitkhlieh kaba kham khraw ha ka rukom thoh eksamin.
Ka jingïakhih ka la nangjur shuh shuh hadien ba ki pulit ki la pyndonkam da ki lathi bad pyndonkam da ki lyer pynsat khmat ban pynpra ïa ki nongïakhih kiba ïaid sha Parliament ha ka jingïaid paidbah jong ka “Sansad Chalo”.
Ka CJP ka la pdiang sngewbha ïa kane ka rai jong u Wangchuk hynrei ka la ong ba ka jingïakhih ba jai jai jong ka ha Jantar Mantar kan ïai bteng haduh ba u Pradhan un hiar shuki.
Ha ka por ba dang jur bha ka jingïakhih jong ki samla pule ka jingshong ïakhih jong ka seng Cockroach Janata Party (CJP) ha Jantar Mantar bad ka jingpynbor jong ki seng pyrshah ha ka por jong ka jingïalang jong ka Ïingdorbar Thaw Aiñ kaba mynta halor ka jinglait tuh jong ki jingkylli NEET, u Myntri Rangbahduh ka ri u Narendra Modi u la pynbna ba ka sorkar kan thaw ïa ki ïingbishar kiba thikna bad ban pynthikna ïa ki ïingbishar ba kyrpang na ka bynta ki briew kiba donkti ha ka jingpyllait tuh ïa ki jingkylli eksamin.
Ha ka kyrwoh ba la sam ha ki social media, u Myntri Rangbahduh u la ban jur ba ka jingïada ïa ki jingmyntoi bad ka lawei jong ki samla ka jaitbynriew ka dang long ka mat ba kongsan tam jong ka sorkar.
U la pynthikna ba u la bthah ïa baroh ki bor bad ki heh kiba ïadei ban pyntreikam mardor ïa ki sienjam kiba donkam ban pyntreikam ïa kine ki lad ki lynti kiba sted, da kaba tei ïa ki jingpynkylla kiba ïai bteng kiba don jingthmu ban ïada ïa ki samla pule.
U Modi u la pynmih ruh ïa ka jingmaham kaba tyngeh ïa kito kiba leh thok ha ka pule puthi.
U Myntri Rangbahduh u la pynpaw ba ki briew kiba pyrshang ban buh jingma ïa ka lawei jong ki samla kin sa hap ïakynduh ïa ki jingeh bad ba yn ym pyllait ïa ki na ki kti jong ka aiñ.
Kane ka jingpynbna ka wan hapdeng ka jingpyrkhat kaba jur jong ka ri bad ki jingïakhih jong ki samla pule kiba la saphriang bha ha kaba ïadei bad ka jinglong hok ha ki eksamin ba ïakhun bad ki jingïakynad halor ka jinglait tuh ki jingkylli, kaba pynbeit ïa ki jingdawa kiba la slem bha ban pynkloi ïa ka jingkitkhlieh katkum ka aiñ bad ki lad pynshitom kiba kham tyngeh hapoh ka rukom hikai jong ka ri.
Ki seng pyrshah, kiba kynthup ïa ka Congress, Samajwadi Party bad ka Aam Aadmi Party, ki la dawa ban ïakren ïa ka NEET ha Parliament. Katba ka sorkar ka la pdiang ïa ka jingtyrwa ban ïatai halor ka jinglait tuh jong ki jingkylli, ka la pyni ïa ka jingsngew artatien haba ïadei bad ka jingiehnohkam jong u Pradhan.
U nongaiktien jong ka Cockroach Janta Party (CJP), u Ashutosh Ranka u la ong, “Ngin dang sah hangne haduh ban da weng noh ïa u Dharmendra Pradhan. Katba nang ïaid ki sngi, ka mat kam dei shuh tang ïa u Dharmendra Pradhan. Ka jingpyrkhat mynta ka la phai sha u Myntri Rangbahduh ka ri.
Lada phi sngap ïa ki jingpyrta hangne, phin sa ïohi ba ka jingbitar jong ki briew kan nang jur ha kaba la bthah sha u Myntri Rangbahduh ruh kumjuh, halor balei ba um long uba kloi ban sngap ïa ki. Nga tharai ba ka sorkar ka dei ban sngewthuh ïa kane namar ki briew mynta ki la sdang ban kylli jingkylli beit sha u Myntri Rangbahduh.”
Halor ka rai jong u Modi ban thaw ïa ki ïingbishar ba sted ban pynthikna ïa ka jingpynshitom kaba tyngeh ïa kito kiba donkti ha ka jingpyllait jingkylli tuh, u MP ka Samajwadi Party u Ram Gopal Yadav u la kylli hato ka jinglait tuh jong ki jingkylli ka NEET ka dei kaba nyngkong eh ha ka ri.
“Ka dei ban don ka kot lieh halor katno tylli ki jingmih khubor ki la jia ha ka por ba u dang synshar. Katno ngut ki briew ki la shah pynngat ha ki kyndon aiñ, katno ngut ki la shah pynshitom, katno ngut ki la leit sha phatok, katno ngut ki la shah rai pynrem, ym pat lah ban leh ei ei haduh mynta halor kane” la ong u Yadav.
