Imphal, Jylliew:
Ki pulit bad ki shipai ïada ri jong ka Manipur ki la kem ïa saw ngut ki dkhot jong ka kynhun lehnoh Kangleipak Communist Party (KCP) (Noyon) ha ki ar tylli ki jingpyntreikam.
Ha ka 19 tarik, Jylliew ki pulit jong ka Manipur ki la kem ïa u Kharibam Surchandra Singh, ïa uba la tip ruh da ka kyrteng kum u Telheiba (53), na Imphal East District.
U Singh, u la long u dkhot ba don hapoh ka kynhun KCP (Noyon), une u la donkti ruh ha ka kam dawa pisa na kiba bun ki jaka treikam sorkar bad na ki skul.
Ki pulit ki la ïoh ban kurup da T. 1,15,000, kawei ka kali arshaka, ar tylli ki Mibile Phone, kawei ka pla kieng bad pla pisa na u. Kumba la khmih lynti, la ong ba kane ka jingïoh kem ïa u kan sa pyntroiñ ïa ka kynhun pyntriem khamtam ban khanglad ïa ki kam dawa pisa.
Ha kaba ïadei bad kum kane ka jingjia, ha ka 18 tarik, Jylliew, ki shipai ïada ri ki la ïoh ban kem ïa lai ngut ki briew kiba dei ki dkhot jong ka kynhun lehnoh KCP (Noyon) na Kakching distrik. Ïa kine kiba la shahkem la tip kyrteng kum u Laikhuram Sanatomba Singh, ba la tip ruh da ka kyrteng kum u Mani (24), u Heikrujam Dinesh Singh (21), bad u Tongbram Nganthoiba Singh (21). Kine ki briew ki la donkti ha ki kam dawa pisa ha kaba ka la ktah jur ïa ki riewpaidbah.
Ha ka por ba la pynlong ïa ka jingpyntreikam, ki shipai ki la ïoh ban kurup ïa lai tylli ki Mobile Phone, ka kali saw shaka bad ki shithi dawa pisa. Ka jingtohkit ïa kine kiba la shahkem ka dang ïai shakhmat khnang ban lap bad ïohkem shuh shuh ïa ki dkhot jong kane ka kynhun pyntriem.
