Bah D. Pakyntein
Ka Shithi U Paul u Apostol sha ki nong Rom 3:10 – Kumta la thoh : Ym don uba hok, em, ym don uwei ruh. Don bun bah ki aiñ ki kanun ha kane ka pyrthei. U Moses u lah ai, ïa ki 10 hukum, kaba u lah ïoh na U Blei. Tang shiphew tylli, hynrei ka long kaba eh bha ban koh-nguh. Kawei na ki, ka Hukum ban burom ïa ki kmie ki kpa, kaba kham suk ban kohnguh. Hynrei, haba dang don, ki khlieh ka ïing, ne ki barra boss, kiba dang peit/leh shiliang ïa la ki khun: ki khun kin bitar, bad ka pynlong ïa ki ba kin pynkheiñ ïa katai ka Hukum, hap kit pop ei kha-ma-kha, bad bun shah ki kmie ki kpa kin kit ka pop, namar dei ma ki kiba pynlong ïa ki khun ban ym burom ïa ki. Long katba long, kat kum ka Shithi u Paul sha ki nong Ephesos 6:2 – ki khun ki dei beit ban burom ïa ki kmie ki kpa (kaba long ka hukum kaba nyngkong badon jingkular) Ephesos 6:4 – Phi ruh ki kpa to wat pynbitar ïa la ki khun : Sha ki Galatia 3 : 28 – Ym lah don u Jiw lymne u Grik, ym lah don u mraw lymne uba laitluid, ym lah don shynrang bad kynthei : namar phi baroh phi ialong uwei ha U Khrist Jisu. Kane ka jinghikai, ba u Khrist Jisu, um peit / leh shilliang khmat ïano ïano ruh.
Don pat ki kpa, kiba iehnoh ïa la ka tnga, bad ki khun, khlem da don ka daw kaba biang. Hato un phohsniew ba ki khun kin burom ïa u ? Ki khun ynda ki lah sngewthuh, kin kylli ïa ka kmie, shaei i papa jong ngi ? Ka long ka jingkylli kaba eh bha ban jubab. Ka kham suk ban jubab lada u kpa u lah khlad noh. Kan ong: “i pa baieit jong phi i lah don lang bad U Jisu”, oh, ki khun kin kmen, kin da sngewbha eh. Wat lada um don shuh, u im ha ka dohnud ka jong ki. U ai mynsiem ïa ki,miet la bad sngi.
Ka lah dei ban don ka aiñ, kaba pyrkhing, ha ka shongkha-shongman, ym dei shuh, ban shu ïashong thoh mut thohmat, khlem jing-thoh jingtar, kaba lah ithuh kat kum aiñ, ban ioh ïa ka Sertiphiket ïathoh (Marriage Certificate), kane kan ai bor ïa ki longkmie, khnang ba, uba ieh, un hap siew, da kaba ot na ka jingioh jong u. (yn bynta mar katjuh, hapdeng ma u, ka tnga bad ki khun), man la u bnai, namar ka kmie ba duk, kam lah bsa ne phah skul marwei, bad kane ka dei kawei na ki daw bah, ba hiar shatrai ka jylla jong ngi.Wat lada ka kmie ka dei kaba riewspah ruh, un hap ai kumjuh / katjuh. Donkam ka aiñ kaba pyrkhing, ba kim bit ban ïalehkai, ïa ka lawei ki khun ki kti, ka Ri jong ngi.
Ki khun kiba shah ïeh ha ki kpa, ki lehraiñ, namar para khynnah, kin ong, ba kim ju iohi ïa i papa jong ki. Ki peit ïam rem, ban iohi ba ki kpa ki kdup, ki bah ïa ki pa-ralok khynnah. Ko, ki khun rangli, kam dei ka pop kaba phin bah, bad bun shah un bah uta u kpa, uba lah ïehnoh beiñ ïa phi. Hynrei burom ïa u, kumba la thoh bad phin ioh ka jingkyrkhu.Wat ïam rem, wat kuslai : u don U Jisu u ban pyntngen ïa phi, bad ïa ka kmie ka jong phi. Pule minot ban ioh ka lawei kaba phyrnai. Ki khynnah rit, ki tang shu iohi, ba ki kmie ki kpa, ki paieit ki meiieit, ki nahnah ki mama, ki hynmen, ki nong ïarap ha ïing, ki lah ïeng lain ban wan shaw skul ïa ki da ka jingieit, ki rah bad kaweh kti da ka jingkmen. Hynrei, tang slem leit shaw; um-mat ki jaw.
Don bun ki kpa, kiba dih kyiad, barabor ki khun kim da salia than eh, namar haba, ki iohi ba ki kpa khamtam kiba duk, ki dei pat, kiba kit ba bah ïa ka ïing ka sem, bad ki bym peit /leh shilliang, ki kheiñ duh ïalade, ban kiew ki khun, ki ai markylliang ka jingieit. Shisien ba ki ieit, ïa ki kmie ki kpa, ki lah pyndep bad kohnguh ïa kawei, na ki 10 Hukum, kaba pynsngew bha ïa U Trai.
