Itanagar, Jylliew:
Ki la don kumba 20 ngut ki khynnah pule kiba la ud shitom kpoh halor ka jingpynshisha ba ki la bam ïa ka jingbam hapoh ka Hostel kaba ki sah ha ka Sngi Palei ha Agartala. Ha ka jingïakren bad ki nongthoh khubor, ka Mita Das, kaba long kawei na ki nonghikai jong ka skul Bodhjungh Girls Higher Secondary School ha Agartala, ka la ong ba hadien ba la dep ban duwai haba ki khynnah ki la leit rung shapoh kamra klas, ki la don kumba katto katne ngut kiba la ud shitom kpoh.
“Ngim tip ei ei kaei kaba la jia ïa kine ki khynnah naba baroh na kine kiba ud shitom ki dei kiba sah Hostel. Ki la don kumba katto katne ngut napdeng jong ki kiba la kyllon, ha kaba la khot ïa ka kali kit nongpang bad pynkit mar mar ïa ki sha ka jaka ai jingsumar ïa kumba 12 ngut ki khynnah,” ka la ong. Kumba la ïathuh kawei na ki khynnah pule, la ong, “Haba ngi wan sha shul baron ngi la sngewkyndit, ngi la sngew shitom kpoh bad pang lut ka met ha kaba ngi la prie bad sdang ban sngewtlot. Ngi la sah ha ka Hostel ba la tip kyrteng kum ka Maharaja Bir Bikram Welfare Society, bad hadien ba ngi la dep bam jingbam step, ngi la mih ban leit skul. Ngi la bam da u dai bad ka ja ha kane ka step.”
Sa kawei pat ka khynnah ka la ong, ba ki la wan sha skul hadien ba la dep ban bam jingbam step ha kaba baroh ngi la shitom kpoh. Hadien kane ka jingjia ki nonghikai ki la pynkit mar mar sha GB Pant Hospital, ha kaba baroh kine ki khynnah kiba la kem pang ki la shah sumar.
Ha kaba ïadei bad kane ka jingjia, u Deputy Medical Superintendent of GB Pant Hospital, u Kanak Chowdhury, u la ong ba baroh kine ki khynnah ki dei kiba sah ha Maharaja Bir Bikram Welfare Society ka Hostal kaba don ha Indranagar ha Agartala ha kaba baroh ki la kem pang.
“Kiba bun na ki ki dei kiba la don ïa ki dak ki shin jong ka jinglong bih ka jingbam ba ki bam. Hadien ba la ïoh jingsumar, kiba bun na ki ki la kham koit. Ki la don kumba 20 ngut ki khynnah kiba la shah sumar bad ki la don kumba katto katne ngut napdeng jong ki kiba la shah pyllait noh hadien ba ki la ïoh jingsumar bad dawai. Kine ki khynnah ki la dap da ka jingsngew tieng sngewsyier khamtam ba ki don shajngai na ki kmie ki kpa jong ki, hynrei ka long kaba donbok ba la ïohlad ban pynkit mar mar ïa ki sha ka jaka ai jingsumar ha kaba ki la kham koit. Ngi la suba ba ka dei na ka jingsniew ka jingbam ba ki bam bad artat na ka jingkylla jong ka jinglong ka suiñbneng,” u la ong.
