Chennai, Jylliew:
Ka jingïap jong ki briew ha ka jingjia kaba sngewsih na ka jingdih ïa ka kyiad kaba la kylla bih ha Kallakurichi ha Tamil Nadu ka la kiew sha 57 ngut haduh ba thoh ïa ka khubor, kata haduh ka Lah Sngi U Blei, la ïathuh ka tyllong khubor.
Kumba ka long mynta, la ong ba ki la don kumba 156 ngut ki briew kiba dang shah sumar ha ki hospital sorkar. Ki la don baroh kumba 110 ngut ki briew kiba dang shah sumar ha Kallakurichi Government Medical College hospital.
Ki la don 12 ngut kiba la shah sumar ha Puducherry, 20 ngut ha Salem bad saw ngut ha Villupuram Government Hospital, la ïathuh ki bor pynïaid distrik. Haduh mynta ki la don kumba 32 ngut ki briew kiba la ïap ha Government Kallakurichi Medical College and Hospital, 18 ngut ha Government Mohan Kumaramangalam Medical College and Hospital ha Salem.
Saw ngut ki dei kiba la ïap ha Government Villupuram Medical College and Hospital bad lai ngut ha Jawaharlal Institute of Postgraduate Medical Education and Research (Jipmer) kaba ha Puducherry.
U Myntri Rangbah jong ka Tamil Nadu u MK Stalin, ha ka por ba u la ai ka khubor sngewlem halor ka jingkhlad noh jong kine ki briew, u la ong ba ka sorkar jylla kan sa ai jingïarap bad kyrshan ha ka ban pynlut bad kyrshan ha ki jingpule bad ki jinglut ha ki Hostel na ka bynta ki khun jong kine ki briew kiba la ïap ha ka jingjia ne kito kiba la duh noh ïa baroh ar kata ïa ka kmie bad u kpa ha ka jingjia kaba sngewsih kaba la jia Kallakurichi.
Ha ka jingkren kaba la u la ai ha ïingdorbar, u Stalin u la ong ba ka sorkar jylla kan sa pynbiang da mar `. 5000 man u bnai kum ka jingkyrshan pisa ïa kine ki khynnah haduh ba kin da dap 18 snem ka rta na ka bynta kito kiba la duh noh ïa ki kmie ki kpa jong ki ha ka jingjia bad `. 5 lak yn sa thep kum ka Fixed Deposit ha ki kyrteng jong kine ki khynnah kiba la duhnoh ïa ki kmie ki kpa jong ki.
Ha kaba ïadei bad ka jingjia, ka kynhun CB-CID jong ki pulit ka Tamil Nadu ka la pynlong ïa ka jingtohkit kaba bniah halor ka jingjia hapoh ka jingpynïaid bad ka jingkhmih jong u SP Shantharam.
Kumba la ïathuh u Collector jong ka Kallakurichi, la ong ba ki la don kumba 7 ngut ki briew kiba la shahkem ha kaba ïadei bad ka jingshah kynnoh donkti ha ka jingjia ha Kallakurichi.
