Houston, Jylliew:
Ki pulit ka nongbah Texas jong ka United States, ha ka Sngi Nyngkong ki la ioh kem noh ia u suba don kti halor ka jingpyniap ia u nong India 32 snem ka rta hapdeng ka jingleit lute na kawei ka dukan hapoh Dallas.
U Dasari Gopikrishna, u la leit poi sha US dang ha kine ki phra bnai mynta hynrei u la shah siat bad khlad noh katba u dang don ha ka dukan Pleasant Grove kaba don ha Dallas, kaba la jia ha ka 21 tarik u Jylliew.
U Gopikrishna u dei na ka shnong Yajali jong ka distrik Bapatla na ka jylla Andhra Pradesh hapoh India.
Kumta, la ong ba ki pulit ka Texas ha kane ka por pat ki la ioh kem noh ia utei u suba don kti uba la don kumba 21 snem ka rta, ia uba la ithuh kyrteng kum u Davonta Mathis bad uba don kti ha ka jingpyniap ia u Gopikrishna ha katei ka jingjia ha u Jylliew.
Ki pulit ki la pynngat ia u Mathis hapoh ki kyndon pynkheiñ aiñ kiba kynthup ia ka jingpyniap briew. La ong ruh ba u Mathis u la siat bun kuli ia u Gopikrishna kynthup ia ki bynta jong ka khlieh.
Ha katei ka jingjia, la ong ba u Mathis u la leit rung sha katei ka dukan kaba u Gopikrishna u don bad ha kaba u la siat ia u Gopikrishna uba ap ia katei ka dukan bad mar ia dep siat hi, u Mathis u la lute ia ki jingdon- jingem na katei ka dukan bad phet krad noh shuwa ban wan poi ki pulit.
Ia u Gopikrishna la pynkit mar-mar sha ka jaka sumar kaba don hajan ha katei ka por, hynrei la ong ba ki bor pyniaid kim lah shuh ban iarap ia u namar ki jingmynsaw ki la bun jaka bad u la khlad noh tang hadien katto- katne por hadien ba la poi hapoh ka jaka sumar.
