Tehran, Naitung:
Katkum ki khubor, la iathuh ba la iohsngew ia ki jingbthei bom ha kylleng ki bynta ba shathie jong ka Iran, kynthup ruh hajan ka jaka pynbthei nuclear ha Bushehr, ha ka Sngi Palei (9 tarik u Naitung). Hynrei ka America ka la kyntait ba ka donkti ha ki jinghiar thma ia ka Iran. Ka Iran ruh kam shym la kynnoh ia kano kano ka ri halor katei ka jingshah thombor.
Ka tnad pathai khubor AFP, ka iathuh ba ka jinghiar thma jong ka US-Israel, ka la ther ia ka jaka treikam jong ki shipai, kaba don ha rud jong ka Bushehr, kaba don tang kawei ka karkhana nuclear jong ki riew paidbah, ha Tehran.
“Ki katto katne ki bynta ha Bushehr, ki la shah thombor mynta ka sngi, kynthup ia ka perimeter jong ka jaka pynmih bor ding nuclear, ka ktem shipai ha ka nongbah Choghadak bad ka kad ri dohkha ha ka thain shatei jong ka jylla,” la ong u Ehsan Jahanian, u Symbud Lat jong ka nongbah Bushehr.
Ym shym la don ba iap, la ong u heh sorkar.
La iohsngew sa lai tylli ki jingbthei bom ha ka nongbah Konarak kaba don shathie, ong ka Mehr News Agency jong ka Iran.
U heh jong ka US, u iathuh ha ka Al Jazeera, ba ki shipai jong ka Washington, kim don satia ha lyndet jong katei ka jing thombor kaba dang shen.
U myntri kam pohiing jong ka Israel, u Israel Katz, ha ka sngi Thohdieng, u la byrngem ban sdang biang ia ka jinghiar thma pyrshah ia ka Iran “da ka bor kaba kham jur shuh shuh.”
“Ka kynhun shipai ka long kaba la pynkhreh bad kaba la pynkhreh na ka bynta ban sdang biang ïa ka jingïaleh, khnang ban ïoh biang ïa ka jingkhlain ha ka suiñbneng bad ban hiar thma biang… ha Iran, ban pynduh ïa ki jingma, kynthup ïa ka sien kaba lai lada donkam,” ong u Katz ha ka jingïalang shipai.
“Lada ngi hap ban leit phai biang, ngin leit phai biang, da ka bor kaba kham khraw shuh shuh,” u la bynrap.
Ka khubor jong ki jingshah thombor ba thymmai, ka la mih katto katne kynta hadien ba la tep ïa u nongïalam ba ha khlieh duh jong ka Iran, u Ayatollah Ali Khamenei, uba la khlad noh, ha ka jaka mane kyntang tam jong ka ri, jong u Imam Reza, ha ka step jong ka Sngi Thohdieng.
