Washington, Naitung:
Hadien ka jingtohkit kaba bniah, 8 ngut ki suba don kti ki la shah pynngat kyndon halor ka jingthmu thombor da ki drone bad ki suloi ‘Sniper’ ba la pynthut ha ka tamasa ialehkai ‘cage-fighting’ jong ka UFC kaba la pynlong ha White House ha u bnai Jylliew.
Ka jingmudui, kaba la bishar bniah bha ha Ohio, ka la pynpaw ia baroh 8 ngut ha ki ar tylli ki jingthmu ba kyrpang, kawei ban ai jingkyrshan ia ki lehnoh bad kaba ar ban leh ia ka kam thombor ne ban pyniap briew ha ka jaka treikam jong ka sorkar bad ban pyniap ia u heh ka sorkar pdeng.
Watla katta, la ong ba kam pat da shai na ki kot ki sla jong ka iingbishar haduh katno ki nongwan thombor ki lah ban poi hajan ban lah ban pyndep ia katei ka jingthmu lada ym shym la pynthut ia ka.
Katkum ka jingmudui kaba thymmai, katei ka jingthmu ka la sdang ha u bnai Jymmang, ha kaba katei ka kynhun ka la sdang ban lum pisa, ki tiar siat, ki tiar siat, ki tiar iada met, ki tiar pynbthei, ki drone, ki tiar sumar, ki tiar pyniadei bad kiwei kiwei ki tiar.
Dei ha ka 10 tarik u Jylliew ba ki bor jong ka ain ki la tip ia ka jingma kaba lah ban mih na ka jingialehkai jong u President Donald Trump ha ka UFC, saw sngi shwa ban pynlong ia ka jingialehkai kaba la khleh lang.
Ka tnat aiñ ha u bnai ba la dep, ka la pynbna ïa ki jingujor ejahar ha ki distrik bapher bapher ha kylleng ka ri, ha kaba ïadei bad ka buit jong ka UFC, kynthup na Ohio, Missouri, Washington, Nebraska bad Califor-nia. Ka jingmudui ba la pynbna ha ka sngi Thoh-dieng ka pyni ia ka jingpyrshang jong ka sorkar ban pynbeit ia ka mukotduma bad ban pyniasoh lang ia ki nongshah mudui ha kawei ka jingmudui halor ka jingthmu sniew ha Ohio. Ki heh sorkar ki la ong ba ki dkhot jong ka kynhun ki don ki jingmut ba sniew bad ki kyrmen ba katei ka jingshah thombor kan pynthut ia ka sorkar.
Uwei na ki nongshah mudui u la iathuh ha ki nongtohkit ba ki thmu ban pynher ia ki drone kiba la kit bom sha katei ka jingjia bad nangta ban siat ia ki paidbah kiba la tieng katba ki dang phet krad, ong ka jingthoh jong ka sorkar pdeng.
U Tycen C. Proper 19 snem ka rta, uba na Danville, Ohio, bad saw ngut kiwei pat ki la shah kem bad shah pynngat ha Missouri, Nebraska bad California ha ka taiew ba kut jong ka jingïalehkai cage-fighting, kaba la khot Freedom 250. Sa arngut ki nongshah mudui la shah pynngat bad shah kem ha ka FBI kumba shi taiew hadien ha Washington bad Missouri.
Ka tnad Justice ka la ong ba la pynngat ia u briew uba phra ha kane ka taiew. Utei u dei u Chandler D. Scaggs, uba dang 21 snem ka rta, na Chapmanville, West Virginia, uba la shah kem ha katei ka Jylla. La kynnoh ba u Scaggs u la shah buh ban long uwei na ki nongsiat ha katei ka jingthmu ban thombor, ong ka jingthoh ba la pynskhem.
Ka Affidavit ka ong ba ïa u Scaggs, kumba ka paw, yn sa leit shim da u Proper bad rah ïa u sha Washington hynrei u la duh ïa ka jingïadei bad u hadien ba la kem ïa u Proper, kumjuh kum kiwei pat. La kynnoh ba u Scaggs u la ai dak sha katei ka kynhun ba u dang kloi ban ïashim bynta ha katei ka jingshah thombor bad u la pynbeit ban leit sha katei ka jingïalang ryngkat bad uwei pat u nongïatreilang.
U nongïasaid aiñ jong u Scaggs, U Eric Brehm, u la ong ba ka ophis jong u ka dang bishar bniah ïa kitei ki jingkynnoh bad um treh ban kren eiei shuh.
Ka jingthmu ban ai jingkyrshan ha ki tiar ki tar sha ki lehnoh ka lah ban shah set phatok haduh 15 snem, bad ka jingthmu ban pyniap briew ka lah ban shah set phatok haduh ka jingim.
Ki nongmudui jong ka sorkar pdeng, ki kynnoh ba katei ka kynhun, ka la thmu ban pyniap ia U Trump, U Vice President, U JD Vance, kiwei kiwei ki heh jong ka sorkar pdeng, u Myntri Rangbahduh ka Israel, u Benjamin Netanyahu, u nongkhaii ba heh spah, u Elon Musk bad “kiwei pat ki nongshah thong ba heh dor” ha katei ka jingialang.
