Almeria, Naitung:
Katkum ki khubor, la ong ba kajingpluh khlaw ha ka thaiñ Bedar jong ka nongbah Almeria jong ka Spain, ka la wanrah ia ka jingiap jong ki 12 ngut ki nongshong shnong jong katei ka thaiñ South jong katei ka ri, ha kaba, ki bor pyniaid ki la iathuh ba ka jingpluh khlaw ha kane ka sien ruh ka dei namar ka jingjur palat ka jingkhluit jong ka suiñ bneng. La ong ba ia katto katne na kitei kiba khlad ha Bedar, ki dei kiba la ioh sei napoh ki kali jongki hi, hadien ba ka jing lhop palat ka suiñ bneng, ka la pynlong ia ki ban jynjar ban ioh ia ka lyer ban ring mynsiem.
Kumba 150 ngut ki briew ka tnat pynlip ding, ha ryngkat 5 tylli ki trok pynlip ding ki la leit ban ïakhun ia katei ka ding kaba klang ha ka jingkhluit kaba mih na katei ka jaka, kaba la kot ia ka 40C.
La ong ba 6 ngut ki dei kiba la mynsaw ha katei ka jingpluh khlaw, kynthup ia kawei ka longkmie, kaba la mynsaw na ki jing-ing ding bad uwei pat uba kem pang namar ka jingring mynsiem ia ka tdem bad ka lyer khluit kaba wan na katei ka khlaw ba la pluh. Ia kitei baroh la pynkit sha ki jaka sumar kiba don ha katei hi ka nongbah naka bynta ki jingsumar ba kyrkieh.
Ki bor pyniaid ha ka Sngi Palei, la ong ba ki la pynthymmai ia ka jingdon jong kiba khlad na katei ka jingjia pluh khlaw, sha ka 12 ngut, hadien ba la ioh jingtip ba ki don sa 6 ngut kiba shah ktah na katei ka jingpluh khlaw bad kiba la duh noh syndon ia ka jingim jongki ha katei ka jingjia.
