Imphal, Naitung:
U Myntri Rangbah ka Jylla Manipur u N Biren Singh ha kine ki khyndiat sngi ba la leit jong ka taïew ba la lah u la sam ïa ki jingai jingmyntoi kiba kot sha ka T. 300 klur sha palat saw lak ngut ki nongïoh myntoi hapoh ka jingtreikam jong ki skhim bapher bapher jong ka sorkar bad u la pyllait ruh ïa kiba skhim thymmai.
Ki skhim ba dang pynmih thymmai ki kynthup ïa ka song tyngka ba kyrpang na ka bynta ki jingsdang pyntreikam ha ka lad aikam-aijam ïa ki briew ki bym don ïing don sem bad kiba la shah pynkynriah jaka, ka CM Yarn Scheme (kynthup ka jingthied biang ïa ki sai Muga) bad ka skhim ban ai jingkyrshan na bynta ki nongïalehkai Sport.
Ïa ki jingmyntoi hapoh ki jingtreikam jong kine ki skhim yn sa pynpoi beit beit sha ki Bank Account jong ki nongïoh myntoi. U Myntri Rangbah u la pynpaw ruh ïa ki jingthmu pyntreikam bapher bapher jong ka sorkar kiba don jingthmu halor ka jingwanrah ïa ki kam pynroi hapoh ka jylla.
Ki jingtyrwa halor kine ki jingpyntreikam ki la long kum ka Go to Hills, Go to Village, Chief Minister-gi Hakshelgi Tengbang (ka skhim ban pynïoh ïa ka koit ka khiah), ka Startup Manipur bad ka skhim bai bam tymmai sha ki ‘thei ïaplok, kine ki skhim ki long ban ai jingmyntoi sha kiba ha ki jaka them bad ki jaka lum, u la bynrap.
U Singh u la ong ba ka jingïakynad jaitbynriew kaba ym pat ju kham jia mynno mynno ruh bad ki jingjia basngewsih kiba la wan na ki jingthombor jong ki bor ka mariang ki la khanglad ha ka ban wanrah ïa ki kam pynroi ha ka jylla.
U Singh u la ong ba la thaw ïa ki kynhun ai jingsumar kiba kynthup ïa ki doktor, ki Nurse bad ki nongtrei kiba ju leh ïa kiba bun ki kam ban shakri ïa ki lanot ha kiba bun ki jaka sah ba shipor.
Kiba kum kine ki kynhun ki leit sha ki jaka sah ba shipor arsien ha ka shi taïew, ha kaba 68 tylli ki kynhun ki la leit jurip sha ki 238 tylli ki jaka sah ba shipor.
Kumjuh ruh ka la don ka jingai jinghikai bad jingpynsngewthuh halor ban pynïoh ïa ka koit ka khiah kaba long ha ki bor pyrkhat jong ki lanot bad la pynlong ruh ïa ki 1,436 tylli ki jingpeit bniah ha ka liang ka koit ka khiah khlem donkam siew.
Ïa ki jingai jingmyntoi la sam ha ka sngi Palei hapoh ka jingtreikam jong ka skhim kiba kynthup ïa ka CMESS for Relief Camp Inmates, ka jingïarap ba kyrpang kaba mar ` 1 lak sha ki longïing kiba sah ha ki jaka sah ba shipor, ka jingïarap ha ka pule-puthi, ka skhim ban kyrshan ïa ki samla pule kolej, ka jingïarap ba kyrpang kaba long tang shisien, ka jingïarap na ka bynta ka jinglynshop jong u phria, ka jingshlei um, ka CM’s. Yaipha Tengbang Scheme bad ki jingai jingkyrshan sha ki nongtrei kiba don ïa ki sap ban trei da ki kti.
