Imphal, Naitung:
Ki shipai ïada jong ka Manipur ki la ïoh ban pyllait im ïa u briew ba la shah rahbor bad shah set ha san ngut ki dkhot jong ka kynhun Kangleipak Communist Party (Nongdrenkhomba) ha ka 15 tarik, Naitung. Ka jingleit khynra ka la long ha Khongjom Tekcham Makha, kaba hap ha ka thanat Khongjom .
Ha kaba ïadei bad ka jingjia ki la don san ngut ki dkhot ka kynhun kiba la shahkem, kine ki dei kiba la tip kyrteng kum u Konsam Rohit Singh, 23, Yanglem Bikash Meitei, 24, Thangjam Chanba Singh, 27, Moirangthem Anand Singh, 37, bad u Keisham Nelson Singh, 28.
Ha ka por ba la don ka jingpyntreikam, ki shipai ki la ïoh ban kurup ïa kiba bun ki tiar na kine kiba la shahkem, kiba kynthup ïa saw tylli ki pistol 9mm bad shiphew song ki kuli, phra song ki kuli ïasiat, kawei ka suloi 12-bore, kawei ka kali saw shaka bad hynñiew tylli ki Mobile phone.
