Cairo, Naitung:
Uwei u heh nong-ialam jong ka Radwan Forces ka Hezbollah, u la kyllon ïap ha ka jing-leit hiar thma jong ki shipai ka Israel ha ka thaiñ shathie jong ka Lebanon. La ong ruh utei u lehnoh u dei dkhot khatduh jong katei ka kynhun ban shah pynïap hapdeng ki jingiakynad ba la neh slem hapdeng ka Israel bad ka Hamas.
La ong ba u Habib Maatouk, u dei u nongialam uba mih bujli ha ka jaka jong uwei pat u heh shipai ba pawkhmat jong ka Radwan Forces uba la shah pyniap noh ha kaba sdang jong une u snem ha ka jingleit thombor jong ka Israel sha Lebanon.
La ong ba u Maatouk u la khlad noh ha kawei na ki jingshah thombor ha ki shnong khappud ba marjan jong ka Safad El Batikh bad Jmaijmeh ha ki khyndiat bnai ba la leit.
Ha katei ka jingjia ha kane ka kynti, la ong ba 18ngut pat kiba mynsaw ki la poi leit shah sumar ha katei ka jaka sumar sorkar kaba don hajan jong ka Tebnin, ha kaba arngut ki don hapdeng ka jingmynsaw jur bad ka jingim jongki ka don hapdeng ka jingma.
Namar la ong ba ka Israel bad ka Hezbollah ki la sdang iakynad naduh ka por ba ka Israel ka leit ban kput ia ki lehnoh Hamas hapoh Gaza Strip, ha kaba ka Hezbollah ka la pynbna ia ka jingai jingkyrshan jongka sha katei ka kynhun lehnoh Hamas kaba synshar hi ia ka nongbah Gaza mynta da ki phew snem. Bad la ong ba ka Hezbollah naduh katei ka por ba sdang khie ka thma Israel bad Hamas, ka la sdang ban ther ‘namding bad ther bom sha ki shnong ka Israel kiba don ha ki bynta khappud.
Kumta, la ong ba ka jingiakynad hapdeng ka Israel bad katei ka kynhun lehnoh na Lebanon, ka la wanrah ia ka jingiap jong palat 100 ngut ki riew paidbah bad palat 300 tam ki dkhot ka Hezbollah kiba la kyllon iap ha man kitei ki jingjia thombor bad ki jingialeh markylliang bad ka Israel na ka por sha ka por.
