Miami, Naitung:
Uwei u nong Florida, u la shah kem noh hadien ba la bna shaphang ka jing byrngem jong u ia u President jong ka America, u Joe Biden. Kane ka la jia ruh tang hadien katto katne sngi hadien ba u nongiakhun pyrshah jong u Biden- u Donald Trump, u la shah siat ha uwei u runar katba u dang don hapdeng ka jingialang paidbah ban ialap ilekshon.
Ka tnad nongiasaid ain jong ka US ka la iathuh ba u Jason Patrick Alday, 39 snem ka rta, u la shah kem noh ha ka Lah Sngi U Blei na ki thaiñ Shatei jong ka nongbah Florida.
U Alday, uba dei na ka dong Quincy jong ka nongbah Florida, u la phla ba u la ia donkti ha ha ka ban phah ia ki jingthoh ban byrngem- byrsit ia utei u nong-ialam ka US- u President Joe Biden bad kumjuh ruh sha kiwei de ki heh sorkar jong ka US.
Katkum ka jingujor, la ong ba u Alday u la byrngem ia u Biden ha ka por ba u dang shah peit bniah ha kawei ka jaka sumar ha Tallahassee jong ka nongbah Florida hi, ha une u bnai ba la leit.
Nalor kata, la ong ba utei u briew u la iai bteng ban byrngem- byrsit ia utei u nong-ialam ka ri US lyngba ki jingthoh bad jingkren jong u hapoh ka Twitter ‘X’.
Namarkata, ka iingbishar ba haklhieh duh jong ka US, ka la rai ban set patok ia u shipor katba dang pyn-ap ia ka jingbishar kaba pura haba iadei bad katei ka mat.
Haba iadei bad kane, ha ka taiew ba la leit la iohi ba u nongialam barim ka US- u Donald Trump, uba la don 78 snem ka rta, u la mynsaw ha ki bynta jong ka shkor hadien ba uwei u riewkieng suloi u la ther kuli da ka jingthmu ban shim syndon ia ka jingim jong u katba u dang don hapdeng ka jingialang paidbah ban ialap elekshon ha ka sngi Saitjain hapoh Butler jong ka nongbah Pennsylvania.
Hynrei, la ong ba utei u nongialam barim ka US, u thaw lait im ha katei ka jingjia bad utei u kuli uba la lait na ka khlieh jong u, u la leit dei pat ia uwei u nongwan sha katei ka jingialang paidbah bad uba la khlad noh syndon ha katei ka jingjia.
Kumjuh ruh na ka liang ka tnat pahara bad ka tnat syntiat ba kyrpang jong ka US, ka la ioh ban siat kylla ia utei u samla uba dang don tang 20 snem ka rta, ia uba la ju ithuh kum u Thomas Matthew Crooks bad uba la suba ba dei ma u, uba siat ia u Trump ha katei ka jing ialang paidbah ha katei ka sngi.
