Moscow, Naitung:
U nongthoh khubor jong ka US, u Evan Gershkovich, ula shah rai pynrem da ka ïingbishar jong ka Russia ha ka Sngi Palei, ha kaba la rai ruh ban set patok ia u haduh 16 snem kynthih namar ka jingleit synriat jong u sha Russia tang ban ioh phah jingtip sop-sop sha ka tnat syntiat jong ka United States. Kane ka la jia ha ka por ba ka thma hapdeng ka Russia bad Ukraine ka dang thnem bha ha kine ki khyndiat snem ba la leit.
Kumta la ong ba U Gershkovich u la shah rai pynrem hadien jong ki lai tylli ki jingïalang jong ka ïingbishar ha ka jingbishar kaba rieh bad ba kyrpang hapoh ka nongbah Urals jong ka Yekaterinburg, ka nongbah ba la kem ïa u katba u dang leit poi sha katei ka ri ban ioh phah jingtip sha US ha u bnai Lber jong u snem 2023 ba la lah.
Hadien ba la rai pynrem ia u da katei ka rukom, u President ka US- u Joe Biden u la ong ba u Gershkovich u la shu shah kynnoh be-aiñ ha ki bor pynïaid sorkar Russia tang namar ba u dei u nongthoh khubor bad ba u long ruh u nong America hynrei haba ka US ka la dep wad bniah bha, utei u briew um shym la don jingiadei eiei bad ka tnat syntiat jong ka lym-ne uba la phah khnang da ka US ban leit syntiat sha Russia. Hynrei, la ong ba utei u nongthoh khubor u la leit hi sha Russia da ka mon sngewbha jong u shimet ban ioh wad jingtip bniah haba iadei bad ka thma jong ka Russia bad Ukraine.
Kumta ruh la ong ba na ka liang jong ka United States, u Biden ha ryngkat bad ka White House, ki la dawa ia ka Russia ba ka dei ban pyllait noh shi syndon ia utei u nongthoh khubor namar um shym don kti eiei ha ki kam syntiat kumba la pharep da ka Russia. Bad la ong ruh ba ka US kan iai ban ia kane tad haduh ba ka Russia kan da pyllait noh ia utei u nongthoh khubor ka US.
Haba iadei pat bad ka thma Russia bad Ukraine, na baroh arliang- ka US bad ka Russia ruh ki la pynbna ba ka jingiakren halor ka jingbujli ia ki koidi ka dang iaid shakhmat.
Shuh shuh ruh la ong ba dei u nongbishar Andrei Mineyev u ba la phah ïa u Gershkovich sha ka jaka set bindi kaba pyrkhing bha, ka ktem patok jong ka Russia kaba pawnam haba iadei bad ka jinglong jingman kaba eh ia ki koidi ba kin shah set hangtei bad kumjuh ruh ka jing pyntreikam da ki kyndon kiba pyrkhing bha.
