![Kyllon ïap 3 ngut ki dkhot ka Hezbollah ha ka jingleit hiar thma ki liengsuiñ ka Israel hezbollah](https://unongsainhima.com/wp-content/uploads/2024/07/hezbollah-1-720x435.jpg)
Beirut, Naitung:
Katkum ki khubor, la iathuh ba 3 ngut ki dkhot jong ka kynhun lehnoh Hezbollah ki la kyllon iap ha ka jingleit hiar thma jong ki liengsuin ka Israel ha ki katto katne ki jaka ha ka thaiñ shatei jong ka Lebanon ha ka sngi ba la leit.
La ong ba ha ka Sngi U Blei, kawei ka liengsuin thma jong ka Israel ka la leit ther bom sha kawei ka ïingmala kaba don ha ka shnong Houla kaba don Shatei Lam Mihngi jong ka Lebanon, ha kaba arngut ki dkhot jong ka kynhun lehnoh Hezbollah ki la ngat bad khlad noh syndon ha katei ka jingjia. Katba, uwei pat u la mynsaw jur na katei ka jingjia ha katei kajuh hi ka jaka.
Katba, uwei u dkhot ba 3 pat jong katei ka kynhun lehnoh Hezbollah, u la kyllon iap hapdeng ka jingleit khynra jong ki shipai ka Israel sha kawei ka jaka buh tiar siat jong ka Hezbollah ha ka nongbah Adloun.
Ka tyllong khubor jong ka tnad ka koit ka khiah ka la iathuh ba katei ka jingkhynra ka la pynmynsaw ruh ia 6 ngut ki riew paidbah bad ka la pynjulor ia 9 tylli ki iing briew ha katei ka sngi.
Ha kajuh ka por, ki shipai jong ka Lebanon, ki la lap bun tylli ki drone bad da ki phew tylli ki ‘namding kiba la pynher na ka liang jong ka Lebanon sha ka thaiñ shatei lam mihngi jong ka Israel.
Kumjuh ruh na ka liang ka Hezbollah, ka la iathuh ba ka la ioh ban pynhiar kput da kaba leit hiar thma sha katto katne ki jaka bad ki bynta khappud jong ka Israel kynthup ia ka “Dafna colony”.