Jerusalem, Naitung:
U Myntri Rangbah duh jong ka Israel, u Benjamin Netanyahu, ha ka Sngi U Blei u la pynbna ba un phah ïa ka kynhun Myntri ba kyrpang ban leit ïakren ha kane ka taiew na ka bynta ka jingïakren ba thymmai halor ka jingïateh kular ban pyllait noh ïa ki nongshah rahbor kiba dang don hapoh Gaza baroh.
Haba iakren bad ki nongthoh khubor ha katei ka sngi, u Netanyahu u la ong ba katei ka kynhun Myntri kan leit ban pyndep ia katei ka jingthmu ha kane ka Sngi Thohdieng ka ban wan. Kane ka long ruh tang hadien khyndiat sngi ba u Netanyahu u la dep ai jingkren ha ka Congress jong ka United States hynrei um shym la iathuh lypa shano katei ka kynhun Myntri kan leit na ka bynta katei ka jing-iakren.
Ka Qatar bad ka Egypt, da ka jingkyrshan jong ka US, ki la long ki nongpyniasuk ha ki jingiakren ha kine ki por ba la leit, khlem da donkam ia ka jing-iakren ba mar-khmat hapdeng ka Israel bad ka Hamas kaba la rahbor ia ki briew na Israel bad kaba la iakhun thma ruh bad ka Israel mynta la palat hynñiew bnai.
Ki nongpyniasuk jong ka pyrthei ki la pyrshang la bun bnai ban pynskhem ia ka jingiateh soskular hapdeng ka Israel bad ka Hamas ba kin sangeh noh ia ka thma. La ong ba katei ka jingiakren ban sangeh thma kan long ban sangeh shipor ia ka thma kumba hynriew taiew eiei, ha kaba ia ki katto- katne kiba shah rahbor ha ka Hamas, yn ia pyllait markylliang bad kito ki briew jong ka Hamas kiba ka Israel ka la kem bad set patok ha Israel.
U Myntri kam pohiing jong ka Israel, u Yoav Gallant, u la kdew ba ha kane ka sien, ka Israel ka lah ban iasoi ia katei ka jing-iateh lada kiei- kiei baroh ki iaid beit katkum ba la thmu.
Haba iadei bad kane, la ong ba utei u Myntri Rangbahduh ka Israel- u Netanyahu, u la byrngem la bunsien ba un pynduhjait noh syndon ia ka kynhun lehnoh Hamas ba shyrkhei jong ka ri Palestine bad kumjuh ruh ban wanlam sha la iing ia baroh ki nongshah rahbor kiba la don ha ka kti ki Hamas baroh shi katta naduh ba sdang jong ka thma ha Gaza.
Kumta, la ong ba ka liang pyrshah jong ka sorkar Israel hapoh katei ka ri, ka la pyrshah halor ka jingthmu jong utei u nongialam ha kane ka sien ban phah iakren iasuk lane ban sangeh noh ia ka thma hapoh Gaza Strip namar ka jingbitar jong ki halor ka jingleit thombor jong ki lehnoh Hamas pyrshah ia ka Israel ha une u snem ba la leit, khlem kano-kano ka daw bad ha ka por ka bym shym poi pyrkhat eiei.
