Washington, Naitung:
Ka Kamala Harris, ka Vice President, ka la lah ban pynliem da kaba rit eh ïa u nongïaleh pyrshah jong ka u Donald Trump, ha ka jingthep vote ba la pynmih ha ka Sngi Ba-ar, kaba long ruh kawei na ki jingthep vote kaba nyngkong eh ba katei ka nongialam ka la mih kum ka kyrtong na ka bynta katei ka ilekshon President naduh ba u President jong ka America- u Joe Biden, u la pynkut noh ïa ka jingïalap ilekshon bad u la rai ban sangeh noh na ka jingiakhun ilekshon.
Kumta, la ong ba ka Harris ka la tam da 2 point ia u Trump, kumba 44% lane 42%, katkum ki jingtip ba la ioh lum da ki tnat pathai khubor ha katei ka sngi. Kane ka la long ruh tang hadien ar sngi ba u Biden u la pynbna ha ka sngi U Blei ba un mih noh na ka thup ki kyrtong ban iakhun na ka bynta katei ka ilekshon President ha kane ka sien. Kumta ruh u la kyntu ia ki paidbah nongkyrshan bad ki dkhot ka seng jong u baroh ba kin ai jingkyrshan noh ia ka Vice-President jong u- ka Kamala Harris.
La ong ba katkum ka jingpeit thuh lyngba ka jingthep vote ha ka taiew ba la dep, ka Harris- 59 snem ka rta bad u Trump uba la kham rangbah bad uba la don 78 snem mynta la ong ba ka jing-iakhun jong ki ka la iaryngkat ha ka 44%.
Shuh shuh ruh la ong ba ka Harris, ka nongialam ba paw-khmat bha na ka bynta ka jingkyrshan jong ki Democratic kaba dang ïoh ïa ki jingkyrshan bad ki jingai sngewbha bad kumjuh ruh ïa ki nongmihkhmat ba la kular, ka la sdang ban beh nadien jong u Trump uba la rah lama lypa naduh kine ki sngi ba la leit tang mar ia iohsngew ia ka jingpynbna jong u Biden ba ka Harris kan mih bujli noh ha ka jaka jong u, na ka bynta katei ka ilekshon President ka ban long ha u Naiwieng jong une hi u snem.
