Washington, Naitung:
Ka tnat iatrei lang jong ka US-Canadian North American Aerospace Defense Command (NORAD), ha ka Sngi Palei ka la iathuh ba ki liengsuiñ thma jong ka America bad ka Canada ki la ioh ban tehlakam noh ïa ar tylli ki liengsuiñ pynhap bom jong ka Russia bad ar tylli ki liengsuiñ pynhap bom jong ka China ha ki bynta kiba hap hapoh u pud- u sam jong ka nongbah Alaska ha ka Sngi Balang.
Namar la ong ba ka NORAD ka la lap ia katei ka jingleit rung be-aiñ jong kitei ki liengsuiñ pynhap bom jong kitei ki ri bad kumta ruh la buddien, bad la tehlakam noh ia baroh ar tylli ki liengsuiñ shipai TU-95 jong ka Russia bad ar tylli ki liengsuiñ shipai PRC H-6 kiba leit poi sha ka Alaska Air Defense Identification Zone.
Katei ka bynta ‘zone’ ka dei ka bynta ha kaba ki ju ioh ban peit thuh ia ka jingleit jingwan jong ki liengsuin shabar u pud u sam jong ka jaka iaid ki liengsuiñ jong kitei ki ri ban ioh peit thuh lada jia ba don kino- kino ki kam pyrshah ne ki jingiakynad.
Ki jingpynsangeh ia ki liengsuin jong ka Russia — ha kaba ki shah iakynduh da ki liengsuin jong ka US ne Canada — ki long kiba ju jia ha katei ka thain.
“Ki liengsuiñ ïapom na ka ri America bad Canada ki la pynlong ïa ka jingkhanglad,” la ong ka NORAD, da kaba bynrap ba ki liengsuiñ pynbthei bom “ki la sah ha ka suiñbneng jong ka pyrthei bad kim shym la rung sha ka suiñbneng jong ka America ne ka Canada,” bad ba ïa ka jingtreikam jong ki “ym shym la ïohi kum ka jingma.”
Kumta la ong ba ka tnat iatrei-lang jong ka US-Canadian North American Aerospace Defense Command (NORAD) ha katei ka step Sngi Palei, ka la iathuh ba ki bor pahara ka US bad Canada ruh ki la ioh ban tehlakam noh ia kitei ki liengsuiñ kiba leit poi be-aiñ sha katei ka bynta shalor suiñ kaba kim dei ban tam ne iaid lyngba khlem ka jingbit ne jingpyntip shwa. Nalor kata, la ong ba kitei ki bom ruh kim shym la ioh ban bthei shano- shano ruh hynrei ki la bthei noh halor suiñ.
Hynrei la ong ba kitei ki liengsuiñ ka Russia bad China kim shym la leit poi shapoh u pud- u sam jong ka jaka pynher liengsuiñ ka US bad Canada bad kumta la ong ruh ba kane kam shym la wanrah jingma eiei ia ka US ne Canada.
