Washington, Naitung:
Katkum ki khubor, u President jong ka US- u Joe Biden, u la wanphai biang sha ka White House ha ka Sngi Thohdieng hadien ba u la shong pyn kyrpang ialade kumba katto- katne sngi ha Delaware House, ha kaba ki doktor jong u, ki la pyn tikna ba ki dak jingpang COVID-19 jong u, kim don shuh bad u la koit na kitei ki jingshitom kiba u la ioh kem pang ha kine ki sngi ba la leit.
Haba la buh jingkylli da ki nongthoh khubor ha katei ka sngi, u Biden u la jubab bad ong ba u sngewbha bad sngew kmen shibun ba u la iohi ia ka jinglah jong ka Harris ban iakhun pyrshah ia u nongialeh pyrshah jong u – u Donald Trump bad um sngew khuslai shuh watla u la kynran dien noh na katei ka jingiakhun ilekshon ka ban sa long shen ha une u snem.
Ha ka sngi ba la leit, la ong ba u Biden u la dep ban leh ia ka Binax Rapid Antigen Test bad kaba la pyni ba u la long Negative, kaba mut ba u la koit na ka jingpang Covid kaba u la ioh kem pang ha kane ka taiew ba la lah, la ong u Dr. Kevin O’Connor, u doktor jong ka White House, ha ka jingthoh sha u Press Secretary jong ka White House ban pynshai ba u Biden u la bit ban wan phai biang sha ka kam kaba u ju trei.
Hynrei la ong ba u Biden um shym la jubab jrong ne pynshai haba la kylli bniah ia u halor ki daw ba u la hap ban mih noh na ka jingiakhun ilekshon President bad hato ka Vice- President jong u- ka Kamala Harris kan lah ne em ban pynliem ia u nongiakhun pyrshah jong u- u Trump.
