Rabat, Naitung:
Ka tnat koit ka khiah jong ka Morocco ha ka Sngi Thohdieng, ka la pyntip ba ka jingkhluit palat jong ka suiñbneng ha Morocco, ka la wanrah ia ka jingiap jong palat 20 ngut ki briew tang hapoh 24 kynta ha ka nongbah pdeng jong ka Beni Mellal.
Ka tnad Meteorology ha katei ka sngi ka la ong ba ka jingkiew stet jong ka jingshit ka la ktah jur ia shibun tylli ki bynta jong ka ri North Africa naduh ka Lah Sngi U Blei haduh ka Sngi Palei kaba la kot sha ka 48 degree Centigrade (118 Fahrenheit) ha katto katne ki bynta jong katei ka ri.
Haba iadei bad kane, la ong ba ha Beni Mellal kiba bun na kiba iap ki dei ki briew kiba don ia ka jingpang bampong bad ki tymmen kiba la noh ka rta bad kiba ka met jong ki kam lah shuh ban iakhun ia ka jingkhluit palat jong ka suiñbneng. Kumta la ong na kane ka jingjur palat ka jingshit ka la pynsniew ia ka jinglong jingman jong ka koit ka khiah jong ki.
Namar la ong ba ka Morocco ka la mad ïa ka jingrang tyrkhong kaba hynriew snem lynter bad ka kumjuh ruh ka jingkhluit kaba jur bha ha kane ka aiom lyiur, ha kaba u bnai Kyllalyngkot u dei u bnai uba shit tam ia ka ri naduh ki snem 1940 ba katei ka ri kam ju ioh mad shuh ia ka jingshit bad jingkhluit jong ka suiñbneng.
