Denmark, Naitung:
Ka Queen Mary jong ka ri Denmark ka la kyllon ha madan hadien ba ka la shah tynrah ha kawei ka scooter electric ha ka por ba ka dang ïakren bad phai sha ki nongkyrshan jong ka ha Nuuk jong ka Greenland ha ryngkat ki khun syiem jong ka u Prince Vincent bad ka Princess Josephine. La ong ba kawei ka ar-shaka kaba leit poi iaid lyngba na katei ka jaka ka la kum leit rat beit-beit ia ka Queen Mary bad katei ka mahadei ka la kyllon khram ha madan. Ki bor pahara jong ka ki la ioh bat noh ia katei ka ar-shaka kumjuh ruh ia u nongñiah ban khanglad na kaba lait phet na katei ka jaka ha katei ka por.
Katkum ka durkhih kaba la saphriang bha ha ki rynsan Social Media, la iohi ba katei ka mahadei ka la shah tynrah ha katei ka ar-shaka kaba iaid na katei ka jaka katba arngut ki khun jong ka ki dang ieng ym da jngai tang kumba katto- katne phut na ka jaka ba ka don.
Haba iakren bad ki nongthoh khubor, uwei u nongsakhi ha katei ka jingjia, u la iathuh ba ha katei ka sngi, u iohi ba katei ka ar-shaka ka la leit rat beit-beit ia katei ka mahadei bad hadien kata ka la kyllon khram ha ryng kat ki ummat kiba tuid na ki khmat jong ka namar ka jingpang.
Hadien ba la bat ia u nongñiah u la phla ba um shym la leh khnang haba iadei bad katei ka jingleit tynrah jong u ia ka mahadei ha katei ka sngi bad u la kam ba dei na ka jingthut jong ka ar-shaka.
