Washington, Naitung:
Ki bor pynïaid ka US ki la pyntip ba uwei u nongkhaïi drok ba shyrkhei na Mexico, U Ismael “El Mayo” Zambada ha ryngkat bad u khun jong u paralok barim jong u, u Joaquin “El Chapo” Guzman, ki la shah kem noh na El Paso jong ka nongbah Texas, ha ka Sngi Palei.
Kumta la ong ba ki bor pynïaid ki la ioh bat sa arngut kiwei pat kiba la suba ba ki dei ki nongialam jong ka Sinaloa Cartel kaba dei kawei na ki kynhun khaïi drok kaba shyrkhei bad kaba donbor tam ha ka pyrthei.
U Zambada bad u Joaquin Guzman Lopez, u khun jong u El Chapo, ki mad shibun tylli ki jingshah thwet bad jingkynnoh ha U.S namar ba ki la iadon kti bad lam khmat ha kiba bun tylli ki kam runar jong ka Cartel, kynthup ia ki kam shna bad khaïi ia u jingdih ‘Fentanyl’ uba long u jingdih uba kloi ruh ban pyniap briew.
La ong ba katei ka khubor shah kem jong u Guzman Lopez, ka la mih lypa shuwa ba ki bor pynïaid bad ki tnat aiñ jong ka US kin pynbna paidbah.
Ki heh ka U.S., haba iakren bad ki nongthoh khubor ha katei ka sngi, ki la ong ba ia u Zambada bad u Guzman Lopez la ioh kem noh katba ki dang wan poi ha US na kawei ka liengsuiñ shimet jong ki.
U Zambada, u long uwei na ki nongkhaïi briew uba shyrkhei tam ha ka khana-pateng jong ka Mexico bad dei ma u ruh uba ia seng lang bad u El Chapo ia ka Sinaloa Cartel, uba la shah aiti noh sha ka ri America ha u snem 2017 bad uba dang shah set shi jingim ha patok ha ryngkat ka pyrkhing bad pahara jur ha US.
