Golan Heights, Naitung:
Ka Israel ha ka Sngi U Blei, ka la pyntip ba ka Hezbollah ka la ther bom shajan kawei ka madan phutbol kaba don ha jan ki lum Golan jong ka Israel bad kaba la shim ia ka jingim jong 10 ngut ki briew ha katei ka jingjia, kynthup ia ki khyllung- khynnah. Kumta, ka Israel ka la pynpaw ka jingsngew-khia kaba jur halor ka jingshah thombor jong ki briew jongka ha ka Hamas hadien katto katne bnai ka jingiapyni bor ba markylliang hapdeng ka Israel bad ka Lebannon.
Haba iadei bad kane, la ong ba ka tnat shipai ka Israel ha katei ka sngi ka la pynbna ba ki lehnoh Hezbollah na Lebanon ki dei ban shim ka jingkitkhlieh halor katei ka jingjia bad ba ka Israel kan kput ia katei ka jingleh dusmon jong kitei ki lehnoh. Hynrei la ong ba ka Iran ka la pynshai ba kam shym la iatrei lang bad ka Lebanon ne kam shym la don kti ne don bynta eiei haba iadei bad katei ka jingleit thombor ba thymmai jong ka Hezbollah hapoh u pud- u sam ka Israel.
Ha ka khubor ba la pyllait ha ka miet Sngi Saitjaiñ, ka tnat shipai ka Israel ka la pyntip ba ki don tang 9 ngut kiba ngat bad khlad ha katei ka jingleit ther bom jong ka Lebanon sha ka shnong ba don ka madan phutbol hapoh Israel.
Katba, na ka liang jong ka kynhun lehnoh Hezbollah ruh ka la pynbna ba ka la leit thombor haduh 4 sien ha katei ka sngi, kynthup ia ka jingther da ki ‘namding Katyusha.
Hynrei na ka liang ka Iran ka la thet kti bad kyntiat halor ka jingiadon kti lkang ne jingiadon bynta ha katei ka jingjia ha katei ka sngi.
Namar la ong ba ka Israel ba ki lehnoh Hezbollah jong la Lebanon, ki la ia pyni bor kylliang naduh ki bor ba ka Israel ka la sdang ban leit hiar thms ka nongbah Gaza namar ka jingsdang jong ka Hamas hi ban leit thombor bad rahbor ia ki briew jong ka Israel ha ka 7 tarik u Risaw jong u snem ba la leit.
