Dhaka, Naitung:
Katkum ki khubor, la ong ba ki bor pynïaid ka Bangladesh ki la pyntreikam biang noh ia ka ‘Internet’ ha Bangladesh ha ka Sngi U Blei, shi taiew hadien ba la khang noh da ki bor synshar ha kylleng ka ri ban tehlakam ïa ka jing pynsaphriang ïa ki khubor lamler ha ki Social Media naduh ba jia ka jingïakynad bad ka jingïap ki briew ha katei ka ri namar ka jingpynkylla ïa ka rukom ai bhah ha ki kam sorkar.
Haba ai jingkren sha ki nongthoh khubor ha katei ka sngi, u Myntri ka tnat State for Information & Communication Technology (ICT), u Zunaid Ahmed Palak u la pynbna ba ka sorkar ha kane ka sien kan sam ei noh ïa ka 5GB internet sha baroh ki nong pyndonkam naka bynta kitei ki lai sngi hadien ba la pyntreikam biang ïa ka internet hapoh ka ri namar kitei ki jingjia kiba la pynlong ia ki bor pynïaid ban khang noh shwa ia ka internet ha kine ki sngi ba la leit.
Kumta, la ong ba ki bor pynïaid ka Bangladesh ki la pyllait bad pyntreikam biang noh ïa ka mobile internet ha ka por kumba 3:00 baje janmiet.
Shuh shuh ruh la ong ba ki nong pyndonkam ia ka Robi, Grameenphone, Banglalink bad kiwei kiwei de hapoh Dhaka, ki lah ban ioh ia ka internet ha ka phone jongki ha ka por kumba 3 baje janmiet.
Namar la ong ba ha ka 18 tarik Naitung, ka sorkar ka la khang noh ia ka mobile internet hadien ba la mih ki jing-iakynad bad ki kam thombor ha kylleng jong ka ri Bangladesh baroh kawei.
